Сергей Меняйлойы разамындæй ацыд аппаратон æмбырд

Мобилон фармацевтон пункттæ фæзындзæн, афтектæ кæм нæй, республикæйы уыцы хъæуты. Ахæм хæс æнæниздзинад хъахъхъæнынады министрады раз аппаратон æмбырды сæвæрдта регионы разамонæг Сергей Меняйло. Йæ ныхæстæм гæсгæ, æнæмæнг хъæугæ хостæ балхæныны фадат хъуамæ уа æппæт цæрджытæн. Æмбырды фæнысан кодтой коронавирусы уавæр дæр. Уæрæсейы фæлхасгæнджытæм цæстдарды регионалон управленийы разамонæг Тыбылты Алан куыд радзырдта, афтæмæй хæцгæ низ кæмæ рабæрæг вæййы, уыдоны нымæц дарддæр къаддæр кæны. Ныртæккæ республикæйы ковид-госпиталты ис 145 адæймаджы. Уыдонæй 17 — реанимацийы, 5 пациенты та улæфынц аппаратты руаджы. Хицауады сæрдары хæдивæг Томайты Ирбег куыд фехъусын кодта, афтæмæй тыхджын дымгæйы аххосæй æрцыд электрон тыхæй фæиппæрды 19 цауы. Сæ фылдæр сын аиуварс кодтой, фæлæ, зæгъæм, Мæздæджы æмæ Алагиры районты æвæстиат службæтæ нырма фæстиуджытæ аиуварс кæныныл архайынц. Ныхас цыд Донбассæй лыгъд адæмыл дæр. Сергей Меняйло премьер Дзанайты Барисæн бабар кодта ног лигъдæтты нымæцмæ хъус дарын. Хицауады уæнгтæ фæнысан кодтой æргъты фарста дæр. Уæлдай æргом здæхт æрцыд æхсæнадон транспорт æмæ æнæмæнг хъæугæ хойрæгтæм. Хъуамæ зынаргæдæр ма кæной. Адæмон фронтæн Сергей Меняйло бабар кодта цæстдарæн мадзæлттæ снысан кæнын. Цы цаутæ рабæрæг кæной, уыдоны тыххæй регионы разамонæгæн хъæуы æвæстиатæй хъусын кæнын. Фæнысан кодтой арæзтады фарстатæ дæр. Ахуырады æмæ Арæзтады министрадты 15-æм апрелы онг хъæуы бацæттæ кæнын æппæт рацаразинаг скъолатимæ контракттæ. Ахæм æмгъуыд лæвæрд æрцыд, национ æмæ федералон программæты æххуысæй цы объекттæ араздзысты, уыдонæн дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv