Экстремизмы ныхмæ наукон конференци

Ноджы-ма иу наукон-практикон конференци байгом ис Дзæуджыхъæуы Цæгат Кавказы хæххон-металлургон институты. Йæ сæйраг темæ уыд экстремизмы ныхмæ тох кæнын. Мадзал фыццаг хатт арæзт не `рцыд. Ссис традицион. Ацы хатт дзы бацархайдтой ахуыргонд-эксперттæ Уæрæсейæ, Азербаджанæй, Казахстанæй æмæ Прибалтикæйæ. Бакастысты ацы темæимæ баст докладтæ. Уыимæ ма ныхасы бар радтой хæххон-металлургон институты ректор Юрий Дмитракæн, конституцион æмæ административон барты кафедрæйы разамонæг Цалиты Алыксандрæн, æнæниздзинады министр Михаил Ратмановæн æмæ Цæгат Ирыстоны муфтий Гуæцæлты Хаджимуратæн. Конференцийы æрдзырдтой ацы темæйы ахсджиагдæр æмæ сæйрагдæр фарстатыл. Экстремизмы фæзындтæй арæхдæр æмбæлы терроризм, уыимæ æнæмæнг хъæуы тох кæнын. Уый тыххæй та хъæуы фæсивæдимæ кусын, уымæ гæсгæ студенттæ дæр бацæттæ кодтой докладтæ. Уыдоны фæрцы равдыстой сæ цæстæнгас ацы лыггæнинаг фарстамæ. Ацы мадзал бацæттæ кæныны тыххæй сарæзтой сæрмагонд къорд. Конференцийы кæронбæттæны архайджытæ скæндзысты хатдзæгтæ , сæрмагонд гæххæтты ныффысдзысты ацы фарста аиуварсгæнæн мадзæлттыл, æмæ йæ арвитдзысты нæ республикæйы сæргълæууæгмæ, ахуырад æмæ наукæйы министрадмæ стæй барадхъахъхъæнджыты оргæнтæм. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv