Цæгат Ирыстоны иугонд командæ ленк кæнынæй рамбылдта 23 майданы чемпионаты

Бассейны размæ уал æнæмæнг тренажертыл архайд, уый хæцъæфты хъæддыхдзинад æмæ фæразондзинадæн. Тыхы тренировкæтæ вæййынц 40 минуты. Уый фæстæ та донмæ. Сывæллæттæ æрæджы сыздæхдысты ерыстæй, сæхи дзы иттæг хорз равдыстой. Хуссар æмæ Цæгат Кавказы федералон зылдты чемпионаты республикæйы иугонд командæ Волгограды рамбылдта 23 майданы. Елена Андрушкевич æрмæст фыццаг бынат нæ бацахста, фæлæ ма "Спорты дæснымæ кандидат"-ы норматив дæр сæххæст кодта. Спорты йæхи ныридæгæн 8 азы фæлвары. Цы фæзылды архайы, уый техникон æгъдаæй зындæр æххæст кæнгæ у. Спорты æнтыстджын у йæ тренеры æххуысæй. Игорь Бутякинмæ афæдз æмæ æрдæджы размæ бахауд. Республикæйы иугонд командæйы тренер чызджы курдиат уайтагъд раиртæста. Дисциплинæ, хибарæй куыст æмæ разæнгарддзинад - æппæт ацы æууæлтæй аразгæ у æнтыстдзинад. Фæсивæдмæ тренировкæ вæййы æрвылбон æртæ сахатгай. Бæстон тренировкæтæ æмæ æххæст техникæ. Алцыдæр, цæмæй командæ бæстæйы чемпионаты равдиса хорз бæрæггæннтæ. Ерыстæ ацы бонты цæуынц Казаны.