Тæссаг æххуыс

Æнæниздзинады министр ма ныфс бавæрдта республикæйы амбулаторийтæ дæр кæй сараздзысты. Ног дзæбæхгæнæндæттæ ацы аз фæнд кæнынц байгом кæнын Тарскæйы, Сунжæ, Цъæйы æмæ Реданты. Уый, кæй зæгъын æй хъæуы, æхсызгон хабар у. Фæлæ ныккæлыныввонг чи сты, уыцы амбулаторийтæ та? Зæгъгæм, Хуымæллæджы. Цы дзæбæхгæнæндон дзы ис, уымæ куы бакæсай, уæд зæрдæ ныккæрзы. Медицинон уагдоны кусы 6 адæймаджы. Рынчынты нымæц зынгæ куы фæфылдæр вæййы, уæд уагдоны къах бавæрæн дæр нæ вæййы. Ме`мкусæг Къуымæллæгкаты Фатимæ ацы фарстайы ффдыл абалц кодта Хуымæллæгмæ. Йе`рмæгмæ ма йын бакæсут. Хъæуы цæры 4000 адæймагæй фылдæр. 500 дзы сты скъоладзаутæ. Æхснырсæг æмæ гриппы рæстæг, адæм ацы бæстыхайы цæугæ дæр нæ фæкæнынц. Цæмæй дохтыры æххуыс райсой, уый тыххæй рады фæлæууынц суанг уынджы дæр ма. Амбулаторийы кусы 6 адæймаджы. Хуымæллгы цæрæг Къæбысты Хъазыбег: «Уыдис дзы скорый помощь. Æмæ уыцы скорый помощь дæр мæнæ иу æхсæз мæйæ фылдæр нал и. Ам иу уыдис. Дежурить иу кодта, цæмæй æвиппайды куы бахъæуы, уæд æрбацæуа æмæ баххуыс кæна рынчынæн тагъддæр. Ныр та куы бадзурай, уæд сахаы æрдæгæй фылдæр фæцæуы. Æмæ уæдмæ рынчын цы кæна? Ам ахæм хабæрттæ æрцыд, æмæ дохтыртæ æрæгмæ кæй цыдысты, уый тыххæй йæ цардæй ахицæн адæймаг». Тагъдæххуысы хæдтулгæ æрмæст йæ бакастæй дæр æздахы адæймаджы Советон Цæдисы æнусмæ. Амбулаторийы адæймагæн æрхуыссыны бар нæй. Хуымæтæг капельницæ скæнын дæр уавæртæ нæ амонынц. Афтæмæй, медицинон кусджыты арæх рынчынтæм сæхимæ дæр æрбацæуынц. Къуындæг къоридорты адæм зынтæй цæуынц. Къултæ хъуна кæнынц. Кърантæй дон кæлы рæстæгæй-рæстæгмæ. Уыйимæ ма, æрмæст уазал. Дохтырты куыстыл ам хъаст ничи кæны. Сæ зын уавæртæ цын æмбарынц. Хуымæллæгы цæрæг Быгъуылты Верæ: «Мæнæ кæсут, цы нарæг сты, уый. Мидæнæ дæр нал уæндынц адæм. Пъолтæ цы минут нытондзысты, уый бæрæг нæй. Æмæ дзы чи бынмæ хаудзæн, чи фæрсырдæм хаудзæн. Кæнæ дыл дуар рахаудзæни. Рудзгуытæ æртæккæ аивтой.Фæлæ ахæм æмпъызт бандон тедтæ искуы федтат? Пълтæ ныхæст. Мæнæ циганты балаган. Кæуинаг амбулатори. Æрбацу æмæ йыл фæку». Раздæр хъæуы куыста стыр æмæ райдзаст рынчындон. 2009 азы бæстыхай сæхгæдтой цалцæггæнæн куыстытæн. Адæмæн та ныфс бавæрдтой 2016 азы ног арæзт рынчындон кæй байгом кæндзысты. Фæлæ дæс азмæ хъуыддаг нæ аивта. Хуымæллæгы цæрæг Уалыты Алыксандрæ: «Баххуыс ма нын кæнут æмæ нын бакæнут нæ рынчындон. Советон Цæдисы рæстæг, хъæуы 2000 адæймаджы куы царди, уæд нæм рынчындон дæр уыди. Ныр та 4000 адæймагæй фылдæр цæры хъæуы, æмæ нын нæ рынчындон сæхгæдтой. Уый куыд у?» Хуымæллæджы, медицинон æххуыс райсынмæ цыдисты сыхаг хъæутæй дæр. Раздзог, Цæлык, Заманхъул. Ныр æххуысы фæдыл адæмы хъæуы цæуын Беслæнмæ. Автобус алы хатт нæ вæййы, æмæ цæуын фæхъæуы æрмæстдæр таксийыл. Бирæтæн уый сæ дзыпп нæ амоны. Хъæуы цæрджытæ сæ бон куыд у, афтæ архайынц фарста алыг кæныныл.  Уавæртæй адæмы зæрдæ нæ рухс кæны. Амбулатори цалцæг кæнынмæ дæр нал бæззы. Аразын æй хъæуы ногæй. Ныр та ма уал адæм бæстыхайы алы къахдзæф дæр кæнынц тæрсгæйæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv