Терчы фаллаг фарсмæ

Сунжæйы цæрджытæ сæ хиды сæрты алы къахдзæф дæр хъавгæйæ акæнынц. Цæугæдоны фаллаг фарс хи хæдзæрттæ бирæ ис. Æрвылбон сæ бахъæуы хидыл цæуын. Йæ уавæр цæрджыты тыхсын кæны. Цы бон ныккæлдзæн, уый бæрæг нæу. Хъæуы цæрджытимæ æмæ администрацийы кусджытимæ фембæлд нæ уацхæссæг. Цы дзурынц адæм æмæ куыд кусынц фарста аиуварс кæныныл районы хицауад, уый базондзыстæм нæ дарддæры æрмæгмæ бакæсгæйæ. Доны сæрты алы бон дæр дæр тæрскæйæ. Ныр 5 азæй фылдæр Сунжæйы цæрджытæ хъазт кæнынц сæ хид цы уавæрмæ рцыд, уымæй. Доны фаллаг фарс бирæ адæм дарынц сæ фос, ис дзы фермæтæ æмæ цæхæрадæттæ. Уымæй уæлдай ма ацы хидæй пайда кæнынц æфсад полигонтæм цæугæйæ.Уæззау æфсæддон хæдтулгæтæй  бынтондæр ныпырх. Фермер Теблойты Альберт: «Афтæ зæгъæн нæй æмæ æз фермер дæн æмæ мæн хъæуы æмæ йæ саразут. Хъæуы цы 15 мин адæймаджы цæры, уыдонæй алкæйы дæр хъæуы. Иууылдæ дзы хизынц æмæ дзы иууылдæр пайда кæнынц. Æмæ хид ис иынг æдзæллаг уавæры. Кæд ныккæлдзæн, уый бæрæг нæй. Цалынмæ исты æрцæуа. Æмæ стæй зæгъдзысты ничи ницы дзырдта. Æнæхъæн хъæуæй дæр дзурæм. Цы кусинаг уыд уыцы хид, уый бакуыста. Хъæуы йæ цалцæг кæнын. Цалцæг кæнын дæрнæ. Фæлæ хъæуы аразын ног хид». Хиды фаллаг фарс ис спортивон фæз. Алы бон дæр уырдæм фæцæуы хъæуы фæсивæд. Сæрды та ацы ран сывæллæтæ æрбацæуынц тæвд бон сæхи найынмæ. Уымæй уæлдай ма æвзæр боныхъæд дæр хидыл йæ фæд уадзы. Сунжæйы хъæуы администрацийы сæргълæууæджы хæдивæг Хъæцмæзты Альберт: «Къæвдатæ куы вæййы, уæд дон тынг раивылы æмæ хидмæ схæццæ вæййы дон. Æмæ чи æрцъæл ис, уыцы балкæтæ, сæ бон у, æмæ æркæлой». Хид хауы Горæтгæроны районы администрацимæ. Хъæуы хицауад раджы арвыстой хъæугæ гæхæттытæ. Курынц, цæмæй сын ног хид саразой. Æнхъæлмæ кæсынц дзуаппмæ. Горæтгæроны районы администрацийы арæзтадон хайады хицау Гаситы Хасан: «Хидмæ базилын гыццыл фæрæзтæ нæ хъæуы. Районы уыцы фæрæзтæ нæй. Куыд нæ бон у афтæ йæ программæтæм æфтауæм, цæмæй йæ федералон фæрæзты руаджы бацалцæг кæнæм. Ахæм фæндтæ нæм ис æмæ нын кæд бантыса, уæд сæ спайда кæндзыстæм». Горæтгæроны администраци фарста алыг кæныныл архайы. Æмæ цалынмæ хицауад æхцайы фæрæзтæ агуры, уæдмæ хид дургай згъæлы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv