Дзанайты Барис ма абон амыдта министртимæ æмбырд дæр. Ныхас кодтой паддзахадон программæтæ æмæ национ проектты райрæзты тыххæй. 2023-æм азы республикæйы 23 паддзахадон программæйы фæлгӕты сараздзысты æмæ рацараздзысты 177 бæстыхайы. Уымæй уæлдай ма арæзт фæуыдзысты, фарон цы 5 объекты райдыдтой, уыдон. Уый тыххæй фехъусын кодта Цæгат Ирыстоны экономикон рæзты министр Кучиты Зауыр. Йæ ныхæстæм гæсгæ, уыцы нысанæн рахай кодтой 33 миллиарды æмæ 2 милуан сомы. Ахуырад æмæ наукæйы министры ныхæстæм гæсгæ, арæзт цæуы 5 скъолайы. Ацы аз федералон бюджетæй рахай кодтой ахуырады бæстыхæйттæ аразын æмæ цалцæг кæнынæн 450 милуан сомæй фылдæр. Федералон проект «Экологи»-йы фæлгæты та дарддæр кусынц бырондæттæ айсыныл Алагир, Æрыдон, Дигора æмæ Беслæны. Дзанайты Барис бадомдта министртæй, цæмæй æппынæдзух сæ цæст дарой национ проекттæ æмæ программæтæ куыд æххæстгонд цæуынц, уымæ.