Фыдыбæстæйы Стыр хæсты йæ райгуырæн зæхх чи хъахъхъæдта, уыдоны номыл Зæронд Бæтæхъойыхъæуы ныссагътой 50 бæласы талайы. Мадзал ацыд æппæтадæмон акци «Сад памяти»-йы фæлгæты. Ныр мемориалы цур дидинæг калдзысты фæткъуы æмæ члауийы бæлæстæ. Зæронд Бæтæхъойыхъæуы цæрджыты æхсардзинады æвдисæнтæ сты Советон Цæдисы æртæ хъæбатыры: Плиты Иссæ, Бзарты Георгий æмæ Ходы Константин. Сæ рухс нæмттæ ссарынмæ æрбацыдысты бынæттон администрацийы разамынд, ветерантæ, æхсæнадон Советы минæвæрттæ, пъӕлицæйæгтæ æмæ скъоладзаутæ.