Цхинвалы сног кодтой хъазтизæртæ

Цхинвалы сног кодтой ирон хъазтизæртæ. Рæсугъд сфæлдыстадон мадзал саразтой фæсивæды хорздзинадæн. Уый руаджы æмхиц кæнынц фыдæлтыккон аивады хуыздæр æгъдæуттыл. Уæдæ сын хъазтизæртæ сæ удварны хæзнаты къæбиц дæр кæнынц хъæздыгдæр. Уымæ гæсгæ фæцыдысты афтæ тынг алкæй зæрдæмæ дæр. Фыццаг хатт сæм чи `рбафты, уыдоны, дам, ардыгæй сæ къах нал фæхæссы. Хабæрттæ бæлвырддæрæй базондзыстут нæ дарддæры æрмæгæй. «Ногдзауты фæз»-ы уыцы изæр фæсивæдæй уæлдай хъæздыг зындис. Куыннæ-ма! Ирон кафт æмæ зардыл æнувыд чи у, уыдон æм æрбамбырд сты. Уый нæ, фæлæ ма сын сæ уарзондæр зарæггæнджытæ сæ курдиат равдыстой гом арвы бын. Ахæм ирон хъазтизæртæ ныр Цхинвалы араздзысты алы дыццæг æмæ майрæмбоны дæр. Райдайдзысты-иу изæры аст сахатыл. Æнхъæлмæ дзы кæсынц куыд республикæйæн йæхи цæрджытæм, афтæ уазджытæм дæр. Фадат сын уыдзæн хъæлдзæгæй сæ рæстæг арвитынæн æмæ аивады тых банкъарынæн. Ивгъуыд азы ахæм сфæлдыстадон фембæлдтытæ къуыри иу хатт йеддæмæ нæ цыдысты. Фæлæ сыл фæсивæд афтæ фæцалх сты, æмæ ма сын иу бон бафтауын бахъуыд. Ног фæткмæ гæсгæ, хъазтизæртæ цæудзысты августы мæйы кæронмæ. Тасойты Игорь, Цхинвалы администрацийы культурæ, фæсивæд æмæ спорты хайады сæргълæууæг: «Æхсызгон нын у, адæмы зæрдæмæ нæ хъæппæрис кæй фæцыд, уый. Йæ фыццаг хайы вæййы ирон хъазт, уыйфæстæ дзы саразæм сывæллæттæн хиирхæфсæн мадзæлттæ, фæстæдæр та - фæсивæдæн дискотекæ. Мæ зæрдæ дарын, æмæ нæм алы хатт фылдæрæй-фылдæр адæм кæй цæудзæн. Стыр бузныг мæ зæгъын фæнды, нæ артисттæй нæ фарсмæ чи `рбалæууыд, уыдонæн». Ахæм кафты изæртæ канд аивады нæ ахуыр кæнынц фæсивæды, фæлæ ма сæм гуырын кæнынц Фыдыбæстæмæ уарзондзинад дæр. Сæ уæнгты аив фезмæлд та йæхимæ `ркæсын кæны, Хуссар Ирыстонмæ уазæгуаты чи `рцæуы, уыдоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv