«Æдзæрæг» кинотеатртæ

Стыр экраныл уарзон кинонывмæ бакæсын кæй нæ фæнды. Горæты кинотеатрты кæддæриддæр къахбавæрæн дæр нæ вæййы. Хъыгагæн, районты ахæм рæттæм афтæ бирæ адæм нæ цæуы. Кæд сын киномæ бакæсынæн æмбæлгæ уавæртæ скодтой, уæддæр уавæр нæ ивы. Зæгъæм, районты цы кинозалтæ скодтой, уым адæм бирæ нæ вæййы. Цæмæн афтæ у, уый базоныныл бацархайдта не сфæлдыстадон къорд. Ныртæккæ районты кинозалты боныгон æвдисынц зындгонд фæсарæйнаг киноныв. Фæлæ залы иунæг адæймаг дæр нæй. Алагиры культурæйы хæдзары сæргълæууæг куыд зæгъы, афтæмæй, алыхатт афтæ нæ вæййы. Тынг бирæ дæр не рбацæуынц – Дыууын адæймагæй фылдæр нæ вæййынц. Афтæ дæр вæййы æмæ къордгæйттæй æрбацæуынц, фæлæ арæх нæ, æрмæстддæр цымыдисаг киноныв куы, уæд. Ахæм уавæр ис Æрыдоны культурæйы хæдзары дæр. Ам та залы æрбаййæфтам 13 адæймаджы. Кусджытæ уый стыр циндзинадыл нымайынц, уымæн æмæ сæм уый бæрц адæм рагæй нал уыд. Боны дæргъы сæм хъуамæ уа 7 сеансы. Кинонывтæ –  ахуызон жанрты ист сты. Фæлæ адæм сцымыдис кæнын уæддæр сæ къухы не `фты. Уый та уымæн æмæ сæ хъуыдымæ гæсгæ адæмы фæнды зындгонд фæсарæйнаг кинонывтæм кæсын. Нæ бæстæйы стыр горæтты кинотеатрты кæй февдисынц, уыдонмæ. Фæлæ цæмæй ахæм кинонывтæ балхæной æмæ сæ районтæм æрбаласой, уый тыххæй хъæуы æхца. Уæвгæ, сæ самал кæнæн дæр ис. Фæлæ адæм кинотеатртæм куы нæ цæуой ардæм, уæд цавæр æхцатæй? Киноуарзджытæн зæрдæмæдзæугæ уавæртæ скодтой дыууæ азы размæ. Федералон программæмæ гæсгæ нырыккон домæнтæм гæсгæ сарæзтой кинозалтæ. Сифтонг сæ кодтой мырон æмæ нымæцон кусæнгæрзтæй. Се ппæт дæр сæ разыйæ баззадысты. Фæлæ сæ цин бирæ нæ ахаста. Цалдæр мæйы фæстæ залтæ æрбамæгуыр сты, адæм кинонмæ нал цæуынц. Ууыл сагъæс кæнынц Елхоты кинозалы кусджытæ дæр. Сарæзтой дзы ног 3D зал, кинодзаутæ кинотæм уым кæсынц. Бындурон цалцæджы фæстæ йæ байгом кодтой æртæ мæйы размæ. Ам дæр та сæ цин цалдæр къуырийы йеддæмæ нæ ахаста. Адæмы киномæ кæсын фæнды. Фæлæ уæддæр бирæтæ боныгон нæ уарзынц кинозалмæ цæуын, уымæ гæсгæ дзы адæм бирæ нæ вæййы. Культурæйы хæдзæртты сæргълæуджыты хъæуыдымæ гæсгæ цы киноныв равдисдзысты, уый аразгæ у сеансмæ цал адæймаджы æрбацæудзæн, уымæй. Хъыгагæн, цы кинонывтæ балхæнынц уыдон бирæ хатт адæмы зæрдæмæ нæ фæцæуынц. Культурæйы хæдзары кусджытæ куыд зæгъынц, афтæмæй, зæронд советон кинонывтæм кæсын кæй фæнды, ахæм адæм дæр гыццыл не сты. Фæлæ сæ уымæй уæлдай ма фæфæнды, зыгъæм, ирон кинонывтæм бакæсын. Фæлæ сын уыцы фадат нæй. Кинозалты æвдисынц «Кинойы фондæй» сæм кæй æрбарвитынц, уыцы кинонывтæ. Районты культурæйы хæдзæртты хицæуттæн сæ бон аивын ницы у. Æнхъæлмæ кæсынц сæрдмæ. Гæнæн ис æмæ уæд адæм фæфылдæр уой. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv