Космонавтикæйы скъола йæ дуæрттæ хъуамæ байгом кæна 4 æм февралы

Дзæуджыхъæуы космонавтикæйы скъола йæ дуæрттæ хъуамæ байгом кæна 4-æм февралы. Космосы сусæгдзинæдтимæ сывæллæтты зонгæ кæндзысты нырыккон кусæнгæрзты руаджы. Проекторты æххуысæй сæ бон уыдзæн фенын стъалытæ æмæ бакæсын космосы тыххæй ист кинонывтæм. Уыимæ ма, планетарийы ис дыууæ телескопы, мин хатты бæлвырддæр чи ’вдисы, ахæмтæ. Стæй сæрмагонд тренажер вестибулярон аппараты уавæр сбæлвырд кæнынæн. Планетарийы ис космосы нау «Аполлон» æмæ фидæны космосы ядерон установкæйы макеттæ. Бæстыхайы сæрыл та сарæзтой фæлладуадзæн бынат гранитæй конд планетæтимæ, динамикон скульптурæтæ æмæ хуры нымайæн сахатимæ. Ацы центрæн æнæхъæн Уæрæсейы дæр æмбал нæй. Цæгат Кавказы алы регионтæй лæппутæ æмæ чызджыты боны уыдзæнис космос æмæ космосы техникæйы тыххæй зонындзинæдтæ райсын. Ахуыр сæ кæндзысты, Лавочкины зонадон-куыстадон иугонды кæй бацæттæ кодтой, ахæм специалисттæ. Планетарийы арæзтадон куыстытæ куыд цæуынц, уый федта нæ республикæйы сæргълæууæг Битарты Вячеслав Комайты Русланимæ. Ныртæккæ объект байгом кæнынмæ цæттæ у. Баззад ма дзы кусæнгæрзтæ æмæ макеттæ сæ бынæтты сæвæрын. Планетарий канд астрономийы зонындзинæдты центр нæ уыдзæнис. Фæлæ, ма Цæгат Ирыстоны ахуырадон, культурон æмæ рухстауæн центр дæр. Дзæуджыхъæуы планетарийы бæстыхай арæзт уыд XIX æнусы 90-æм азты. Адæм ма йæ хъуыды кæнынц, куыд раздæры мæзджыт. Советон дуджы мæзджытæй сарæзтой планетарий. Горæты цæрджытæ æмæ уазджытæн уыд зæрдæмæдзæугæ бынат. 1992 азы бæстыхай сæхгæдтой. Нымад у культурæ æмæ архитектурæйы цыртдзæвæныл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv