Сывæллæттæн улæфты бынæттæ

Сæрдмæ бирæ нал баззад æмæ скъоладзаутæ, стæй сæ ныййарджытæ хъуыды кæнынц сæ уæгъд рæстæгыл. Бæлвырд бæрæггæнæнтæм гæсгæ каникулты рæстæг сывæллæтты дзæбæхгæгæн лагерты сæ фæллад суадзынц 40 000 адæймаджы. Уыимæ канд нæ республикæйы нæ, фæлæ иннæ регионты дæр. Дыгургомы туристон базæ «Комы-Арт»-ы æрвылаз баулæфынц 600 сывæллоны. Фæлæ ацы аз объекты сбæрæг кодтой хъæндзинæдтæ. Искæй бон дзы баулæфын уыдзæн æви нæ, уый нырма зын зæгъæн у. Цæуылнæ, уый базондзыстут нæ дарддæры æрмæджы. «Комы-Арт»-ы туристон базæ 40 азы размæ байгом кодтой. Уæд уарзондæр улæфты бынæттæй иу уыд . Куыд фæстæдæр базæйы цыдæртæ баивтой æмæ дзы ныр сæ улæфт уадзынмæ цæуынц æрмæст æрыгæттæ. Улæфæн бынат 2000 метры бæрзæндыл ис. Æмæ дзы цæст цас æххæссы, уый бæрц зынынц Дыгургомы рæсугъд æрдзы нывтæ. Уæдæ уæлдæф та абарæн дæр ницæимæ ис - ам уæлдай сыгъдæг у. Уымæ гæсгæ дзы æрвылаз 600 сывæллонæй къаддæр нæ баулæфы. Фæлæ диссæгтæ ууыл нæ фæвæййынц. Каникулты рæстæг сывæллæтты ахуыр кæнынц ирондзинадыл. Бакусынц се 'æфсæддон цæттæдзинадыл дæр. Фæлæ ацы аз турбазæйы искæй бон баулæфын уыдзæн, уый бæлвырд нæу. Базæйы хицау куыд зæгъы, афтæмæй, бæстыхæйттæ нырыккон домæнтæн дзуапп рагæй нæ дæттынц. Хъæуы сæ бындуронæй сцалцæг кæнын. Фæлæ фаг фæрæзтæ кæм ис? Турбазæйы кусджытæ сæхи тых æмæ хъаруйæ агъуыстытæм базилынц, цæмæй зынгсирвæзтытæй хъахъхъæд уой, уый тыххæй. Фæлæ уый фаг нæу, лыггæнинаг фарстатæ фагæй фылдæр. Нæ республикæйы фæллой æмæ социалон хъахъхъæнынады министрады нын куыд фехъусын кодтой, афтæмæй, ацы аз Цæгат Ирыстоны улæфæн бынæтты суазæг кæндзысты 40 000 сывæллоны. Уыимæ канд нæ республикæйы нæ, фæлæ ма иннæ регионты æмæ фæсарæнты дæр. Ацы аз бацархайдзыстæм æмæ бакусдзыстæм туристон базæты æдасдзинадыл. Уый нæ сæйраг хæс у. Уымæ гæсгæ цæстдарæг хайады специалисттæ æркастыты улæфæн бынæтты уавæрмæ, хатдзæгтæ сын скодтой. Зæгъæн ис æмæ сывæллæтты рцыдмæ лагерьтæ æмæ базæтæ уыдзысты цæттæ. Турбазæ «Комы-Арт» ацы аз йæ дуæрттæ байгом кæндзæн, æви нæ, уый нырма бæлвырд нæу. Хæстæгдæр рæстæг рахæсдзысты кæронбæттæн уынаффæ . Гæззаты Зæринæ_ Мы рядом в: vk.com/irystontv instagram.com/irystontv youtube.com/irystontv twitter.com/irystontv