Хицауадон æмбырд

Республикон æмæ муниципалон бюджетон организацитæ æмæ куыстуæттæ энергетиктæй хъуамæ хæс ма дарой. Ацы фарстæн дзуапп дæтдзысты Муниципалон иугондты разамонджытæ. Уый тыххæй абон бынæттон хиуынаффæйады оргæнты кусджытимæ фембæлды рæстæг фехъусын кодта Битарты Вячеслав. Бæлвырд бæрæггæнæнтæм гæсгæ, иуæй-иу бюджетон организацитæ ивгъуыд 9 мæймæ цы схардз кодтой, уыцы æрдзон газæн нæма бафыстой. «Газпром межрегионгаз Владикавказ»-ы генералон директор Геннадий Саркисовы ныхæстæм гæсгæ, фиппаинæгтæ нæй Алагиры æмæ Горæтгæрон районтæм. Хорз куыст кæнынц Дзæуджыхъæуы дæр. Уый ныхмæ Æрæфы, Дыгуры æмæ Рахизфарсы районты газы фиддонтæн сæ 50%-ы йеддæмæ не `мбырд кæнынц. Республикæйы сæргълæууæг районты разамонджытæй бадомдта, цæмæй афæдзы кæронмæ энергетикон хорзæхтæн мауал дарой. Æмбырды ма бæстонæй дзырдтой адæмæн зæххытæ радтыны республикон закъоны проекты тыххæй. Йæ фæлгæты 2016 азæй Цæгат Ирыстоны зæххытæ райстой 659 бинонтæ. Сæрмагондæй ныхас цæуы, æртæ æмæ фылдæр сывæллоны кæмæн ис, ахæм бинонтыл. Уый тыххæй æмбырды фехъусын кодта республикæйы исбонад æмæ зæххы ахАстдзинæдты министр Тедеты Руслан. Закъон йæ тыхы бацыд 2012 азы. Муниципалон иугондты разамонджыты бæрæггæнæнтæм гæсгæ, боны хыгъды ис 1145 бирæсывæллонджын бинонтæ. Сæ радмæ æнхъæлмæ кæсынц республикæйы районты. Бæлвырддæр та Алагиры районы 173, Æрыдоны 41, Дыгуры районы – 105, Кировы – 48, Мæздæджы районы та – 92 бинонтæ. Битарты Вячеслав бæрнон кусджытæн бахæс кодта рад фæрæвдздæр кæнын æмæ йыл хуыздæр бакусын. Уыимæ ахсджиаг у, зæххы хæйтты цур цæмæй инфрастуктурæ уа нывылгонд, цæмæй адæм электрон тых æмæ æндæр лæггæдтæй æнцонæй пайда кæной. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv