Тагъд медицинон æххуысы станцæйы шофыртæ сæ мызды бæрцæй разы не сты. Ныртæккæ мæймæ исынц 18-20 мин сомы. Уый у дыууæ хатты къаддæр фаронимæ абаргæйæ. Хъæстмæ цыдысты дзуапдæттæг ведомствотæм дæр. Æрæджы та шофыртимæ фембæлдысты республикæйы сæргълæууæг Сергей Меняйло æмæ дзуапдæттæг министр Тебиаты Сосланимæ. Уавæр бынаты сбæрæг кæныныл бацархайдта не сфæлдыстадон къорд. Тагъд æххуысы станцæйы шофыртæн сæ улæфæн бон дӕр сӕхи бар нӕу.  Куыстмæ сæм цы минут фæдзурдзысты  ӕмӕ се 'ххуыс кӕд бахъӕудзӕн, уый бæрæг нæу. Æмæ кæд фæллой дывæрæй кæнынц, уæддӕр сæ мызд фылдæр нæ, фæлæ къаддӕр кæны. Шофыртæ хъаст кæнынц, зæгъгæ, фарон ацафонӕй нырмӕ  сæ мызд дыууæ хатты фæкъаддæр. Кæд пандемийы разæй истой 25 мин сомы, уæд ныр та исынц 18-20 мины. Шофыртæ куыд зæгъынц, афтæмæй сын мызды уӕлӕмхасӕн æфтиæгтæ айстой, куыст та къаддæр нæ фæцис. Адæм нæ фаг кæны. Æппынæдзух сты куыстимæ баст. Ивгъуыд азы кæрон кусджытæ бахъаст кодтой Мæскуымæ. Уый фæстæ тагъд медицион æххуысы станцæйы Прокуратурæ æмæ Фæллойадон инспекци сарæзтой иумæйаг басгæрст. Раздæры льготæты тыххæй куы дзурæм, уæд шофыр-санитары дæсныйад бæстæйы айстой цалдæр азы размæ. Шофыртæ куыд зæгъынц, афтæмæй уæлæмхасæн фиддонтæ истой пандемийы рæстæг. Уавæр куы фæхуыздæр, уæд сæ айстой. Ивгъуыд азы декабры бæстæйы Президент Владимир Путины амындæй фиддонтæ сног кодтой æрмæстдӕр медицинон кусджытæн. Æрæджы шофыртимæ фембæлдысты  регионы сæргълæууæг Сергей Меняйло æмæ дзуапдæттæг министр Тебиаты Сослан. Уæд сын зæрдæ бавæрдтой, сæ уавæртæ сын кæй фæхуыздæр кæндзысты, уыимæ ма сын мызд нысан кæныны фæтк дæр кæй фæивдзысты. Уый та мыздмæ уæлæмхасæн 15% сты. Хæстæгдæр бонты сын сæ бафиддзысты.