Цъыккаты Владимиры хъуыддаг ногæй дзырддаг сси

Цъыккаты Владимиры тыхамæлæты цауы фæдыл кæй азымджын кодтой, уыцы пъæлицæйæгты ахæстонæй рауагътой. Хабар уайтагъд айхъуыст социалон хызты æмæ йæм се `ппæтмæ иухуызон цæстæнгас нæй. Бирæтæ алыхуызон сайтты фыссын райдыдтой масты фыстæджытæ, аххосджынты кæй рауагътой, уый раст нæу, зæгъгæ. Уæ зæрдыл уын æрлæууын кæндзыстæм, Цъыккаты Владимиры пъæлицæйаджы фехсынæй мæнгаххосджын кæй кодтой. Дзæуджыхъæуы пъæлицæйы хайадмæ йæ куы баластой, уæд дзы домдтой йæ аххосыл басæттын, тынг æй фæнадтой. Уыйфæстæ нæлгоймаг рынчындоны амард. Барадхъахъæнджытæ дзырдтой, зæгъгæ, дам, Владимир йæхи æнахуыр дардта, пъолмæ æрхауди æмæ йæ сæр хойын райдыдта. Афтæ фыст уыдис республикæйы мидхъуыддæгты министрады официалон хъусынгæнинаджы дæр. Цъыккаты бинонты адвокат Сихъоты Анжеликæйы ныхæстæм гæсгæ, ахст адæм фæбадтысты, закъонмæ гæсгæ сын цас æмбæлди, уымæй фылдæр æмгъуыд. Слестгæнæг афойнадыл ахæстоны бадыны рæстæг фæфылдæр кæныны гæххæттытæ нæ бафыста æмæ сæ суæгъд кодтой. Ныртæккæ иууылдæр сæ хæдзæртты сты, æддæмæ цæуыны бар сын нæй. 2 азы цы слестгæнæн куыстытæ цыдысты, уыдонæн та бæлвырд хатдзæгтæ нæма ис. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv