Январы кæрон Дзæуджыхъæуы байгом уыдзæн ихын аренæ "Тагбан"

Æнæ ахæм æнцойгæрæнæй ихыл фыццаг хатт чи æрлæууыд, уый йæхи зынæй бауромдзæн. Конструкцийы æххуысæй къахкъæлæттыл фидарæй слæууæн ис. Ихын фæзы администрацийы куыд зæгъынц, афтæмæй ахæм гарзæй арæхдæр пайда кæнынц сывæллæттæ нæ, фæлæ хистæртæ. Ныридæгæн ацы дзаумайы руаджы ихыл бырын сахуыр сты 20 адæймагæй фылдæр. Аренæ байгом кодтой 20-æм декабры. Нырма уал техникон æгъдауæй. Æрвылбон ам фенæн ис дæсгай адæм. Сæ фылдæры их йæхимæ æлвасы, арæх бæрæг кæнынц ацы бынат. Се 'ппæт уазджыты зæрдæмæ дæр цæуы. Объекты арæзтадмæ бавнæлдтой æртæ азы размæ. Ихын аренæ хуымæтæджы нæу. Нырыккон инфраструктурæимæ комплекс. Спортивон залтæ, уæлæдарæс ивæн агъуыстытæ, дыккаг уæладзыджы — уазджыты зонæ. Ам ма ис 36 адæймагæн хостел æппæт уавæртимæ. Ома, центры бындурыл цæудзысты командæты 'хсæн иумæйаг тренировкæтæ. Аренæйы ис дыууæ ихы: сæйраг æмæ чысыл тренировкæгæнæн. Бирæ ихын фæзты ахæм уавæртæ нæй. Уымæ гæсгæ арæх бæстыхай дих кæнын бахъæуы професиионалтæ æмæ фыццаг къахдзæфтæ чи кæны, уыцы спортсменты 'хсæн. Ам ахæм фарста нæ сывзæрдзæн. Инвесторты ныхæстæм гæсгæ, сæйраг нысан — хоккей кæнæ къахкъæлæттыл аив бырыны спорты хуызтимæ йæ цард сбæттын кæй фæнды, уыдонæн æппæт хъæугæ нырыккон уавæртæ саразын. Проекты автортæ бæстонæй архайынц, цæмæй республикон спортсментæ архайой центры бындурыл. Ихын аренæ у проектæн æрмæст йæ иу хай. Уый уыдзæн стыр спортивон комплекс футболон фæзтæ, рог атлетикæйæ архайджытæн фæндæгтимæ, уыдзæн дзы уæззау атлетикæйæ спортсментæн дæр зонæтæ. Уæдæ дзы цæрджытæ æмæ уазджытæн дæр сæ бон уыдзæн сæ фæлладуадзæн рæстæг арвитын, атезгъо кæнын. Проект æххæст кæнынц къæпхæнгай. Дыккагмæ бавналдзысты ацы бонты.