Фыдбылызæй тæссаг

Црауы зæронд скъола ныззаууат. 30 азæй фылдæр афтидæй лæууы. Тæссаг у хъæуы сывæллæттæн. Фыдбылыз расайынæн бирæ кæй нæ хъæуы, уый адæм бæргæ 'мбарынц. Фæлæ цы акæной, уый нæ зонынц. Сæрмагонд къамис бæстыхаймæ `ркаст, банымадта йæ кæлæддзагыл. Фæлæ йын райхалæн нæй, уымæн æмæ культурон бынаты номхыгъдмæ хаст у. Бæлвырддæр хабæрттæ уын ракæндзæн нæ уацхæссæг. Æрдæгкалд къултæ, мæнæ-мæнæ чи ныккæлдзæн, ахæм сæр. Ахæм уавæры ныртæккæ ис Црауы зæронд скъола. Зын бауырнæн у, ацы бæстыхай 50 азы æнтыстджынæй кæй куыста. Фæлæ 80-æм азты бæстыхай ныззаууат æмæ йын йæ фарсмæ ног скъола саразыны фæнд рахастой. Чи равдæлон, уыцы зæронд бæстыхай та сæфты къахыл ныллæууыд. Цæмæй сывæллæттæ æдас уой, уыйтыххæй бæстыхайы рудзгуытæ æмæ дуæрттæ ахуыргæнджытæ сæхи тыхтæй фæйнæджытæй ныххуыдтой. Æмæ ма кæд боныгон скъоладзауты кæлæддзаг бæстыхайы кæртмæ цæуынæй бахизæн ис, уæд сæ изæрыгæтты уымæй ничи бахиздзæн. Ныййарджытæ дæр уымæй тыхсынц. Æмæ ма уый иунæг зындзинад куы уаид... Зæронд скъолайы кæрты быроны обæуттæ равзæрд. Бынæттон цæрджытæ ардæм сæ хауæццæгтæ ласынæй нæ фæлаййынц. Уæдæ дзы æвæгæсæг фос дæр бон-изæрмæ хъеллау кæнынц. Сæ хъуыддæгтæ бакæнынæй сæ ничи бауромдзæн. Иу æмæ дыууæ хатты нæ хъавыдысты хъуыддагыл бакусын. Хъæуы администрацийы ныхæстæм гæсгæ, скъолайы æрдæгхæлд къултæ суанг 2015-æм азы дæр басгæрстой сæрмагонд къамисы уæнгтæ. Бæстыхай ныккæлынæввонг у, зæгъгæ, ууыл сразы сты. Уыцы-иу рæстæг районмæ æрцыд культурæйы министрады фыстæг дæр. Скъола, дам, культурон бынты номхыгъды ис. Райхалæн æй нæй. Хъæуы ма йын ног экспертизæ саразын. Уæвгæ, халын æй бахъуыд, зæгъгæ, уæддæр ын къаддæр æхца нæ бахъæудзæн. Куыстытæн уæззау техникæ хъæуы. Фæлæ хъæуы къухы ахæм авналæнтæ нæй. Уæдæ сæ дзыпп дæр нæ амоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv