Дзæуджыхъæуы сарæзтой спортивон акцитæ

Дзæуджыхъæуы фидауц Терчы былгæрæттæ абон адæмæй байдзаг сты. Алчи сæ йæхи бафтыдта спорты алы хуызтыл. Волейбол, баскетбол, воркаут... Æмæ цы хуызы фæзминагæй нæ равдыстой сæхи адæмы `взаргæдæртæ. Канд сæхæдæг не сты æнæниз цардыуагыл хæст. Ахæм хуызы сæхи дарынмæ сидынц иннæтæм дæр. Æмæ сын æнтысгæ дæр кæны. Афæдзæй-афæдзмæ сæ рæнхъытыл æфты, йæхи зианхæссæг фæзындтæй дард чи ласы æмæ спортыл иузæрдион чи свæййы, уыцы фæсивæдæй. Уымæн æвдисæн абон уыдис нæ уацхæссæг дæр. Нæ о ператор нын фæстæдæр куыд радзырдта, афтæмæй, дам, суанг йæхæдæг дæр хъазты фæзмæ фæцæйтындзыдта. Хуасдзауты Алинæ цы `рмæг бацæттæ кодта, уымæ ма бакæсæм. Волейбол, футбол, бадминтон, баскетбол. Фæсивæдæн абон уыд фадат сæ арæхстдзинад спорты алы хуызтæй равдисынæн. Бæрæгбоны программæ райдыдта чемпионимæ зарядкæйæ. Се `уæнгтæ аивæзтой куыд мадзалы архайджытæ, афтæ йæ уазджытæ дæр. Амыдта йæ олимпаг чемпион Хуыгаты Алан. Куыд зæгъы, афтæмæй ахæм хъуыдæгтæ стыр пайда хæссынц рæзгæ фæлтæрæн. Олимпаг чемпион Хуыгаты Алан: «Тынг æхсызгон мын у ахæм бæрæгбæтты архайын. Нæ республикæйы æппæт спортивон мадзæлтты дæр вæййын. Ам нæ сывæллæттæ, нæ фæсивæд сты. Мах хæс та сын у баххуыс кæнын. Мæнмæ гæсгæ, ацы бон кадджын бæрæгбон у. Нæ бæстæ, уæлдайдæр та нæ республикæ спортивон у. Зæгъæн ис, æмæ æппæты спортивондæр иннæты `хсæн». Зарядкæйы фæстæ архайджытæ ахæлиу сты Терчы былыл. Волейболæй сæ тыхтæ æвзæрстой дыууæ командæйы. Финансон институт æмæ сывæллæтты спортивон скъолайы къордтæ. Чызджытыл цæст дæр нæ хæцыди, афтæ цæрдæг æмæ арæхстджын хъазт кодтой. Иннæ фæзы та фæсивæд баскетболæй хъазынмæ куыд сæрæн сты, уый равдыстой. Се 'хсæн уыдысты куыд профессионалтæ, афтæ хæдахуыр спортсментæ дæр. Æдæппæтæй уыдысты лæппуты 9 æмæ чызджыты 4 командæйы. Командæ "Redbull"-ы хъазæг Мæргъиты Ренат: «Командæты архайджытæ кæрæдзийы хорз зонынц. Алы изæр дæр ам æрæмбырд вæййæм æмæ баскетболæй хъазæм. Фæлæ ныр уæлдай цымыдисаг у, уымæн æмæ уæлахиздзау райсдзæни кубок. Алкæйдæр нæ фæнды уæлахиздзау суæвын. Æппæт командæтæ дæр тыхджын сты». Нæ республикæйы сывæллæтты спортивон скъолаты хъомылгæнинæгтæ дæр абон футболæй хъазынмæ куыд сæрæн сты, уый равдыстой. Лæппутæ уыдысты æртæ комæндæйæ: Барс, Спартак æмæ Юность. Кæд уæлахиздзаутæ се `ппæт не систы, уæддæр бæрæгбоны архайынæй баззадысты разыйæ. Хуыздæрты схорзæхджын кодтой кубоктæ, майдантæ æмæ кады гæххæтытæй. Уымæй уæлдай ма, алы архайæгæн дæр балæвар кодтой олимпаг литературæ нæ республикæйы физкультурæ æмæ спорты министр Гæбулты Владимиры къухфыстимæ. РЦИ-Аланийы физкультурæ æмæ спорты министр Гæбулты Владимир: «Бæрæгбоны мадзалæн йæ сæйраг хæс у æнæниз цардыуаг, физкультурæ æмæ спорт адæмы `хсæн парахат кæнын. Абон у тынг хорз бæрæгбон. Æппæтуæрæсейон олимпаг бон. Нæ республикæйæ рацыдис бирæ олимпаг чемпионтæ. Уый нын сæрбæрзонды хос у. Архайдзыстæм, цæмæй азæй-азмæ уыцы фæтк фидардæр кæна». Кæд спорты хъазæн хуызтыл адæм ахуыр сты, уæд сын йогæйы фæз та цымыдисаг куыннæ уыдаид. Кæйдæр фæндыди, уыдоны бон уыдис йæхи ацы уæнгивæзты афæлварын. Ахæмтæ дзы бирæ разынд. Йогæйы сусæгдзинæдтæ уазджытæн раргом кодта Мзокты Розæ, Айенгары йогæйы инструктор. Куыд зæгъы, афтæмæй ацы спорты хуыз пайда хæссы буарæн дæр æмæ удæн дæр. Айенгары йогæйы инструктор Мзокты Розæ: «Абон сфæнд кодтам бæрæгбонмæ гæсгæ адæмæн йогæйы ахуыртæ саразын. Йогæйæ архайынц куыд ацæргæ адæм, афтæ сывæллæттæ дæр. Суанг ма æнхъæлцау сылгоймæгтæ дæр. Алкæй зæрдæмæ дæр фæцыди. Зæгъæн ис, æмæ йогæ ныртæккæ тынг парахат у адæмы `хсæн. Уый мын тынг æхсызгон у». Ууыл, абон нæ горæты спортивон бæрæгбæттæ нæ фесты. Терчы былы фæзыл сарæзтой воркаутæй Дзæуджыхъæуы ерыстæ. Кæд ацы спорты хуыз æрæджы фæзынд, уæддæр йæ архайджыты нымæц фæлдæрæй-фылдæр кæны. Абон дæр та сын фадат фæзынд сæ арæхстдзинад равдисынæн. Ерысты бацархайдтой куыд нæхи республикæйæ, афтæ Дагестан, Цæцæн, Стъарапол æмæ Краснодары крайы минæвæрттæ. Се 'ппæт дæр фыццаг хатт нæ сæмбæлдысты ардæм. Бирæтæ дзы сты æппæтуæрæсейон ерысты чемпионтæ. Цæцæны Республикæйы минæвар Аслан Сулейманов: «Ацы спорты хуызæй архайын 4 азы. Ерыстæ цы фæсивæд сарæзтой, уыдон мæ æрбахуыдтой ардæм. Алкæй дæр дзы хорз зонын, уымæн æмæ æппæт ерысты дæр иумæ вæййæм. Иннæ ерыстимæ абаргæйæ, абон сты хорз арæзт. Мæ арæхстдзинад æвдисын фристайл номинацийы. Мæ зæрдæ дарын, жюрийы уæнгтæ мын бæрзонд аргъ кæй скæндзысты, ууыл». Фристайлæй уæлдай ма фæсивæд сæ арæхстдзинад æвдисынц æндæр номинациты. 18 азы онг æмæ 18 азæй фылдæр кæуыл цæуы, уыдон сæ арæхстдзинæдтæ `вдисынц хицæнтæй. Æдæппæтæй сты 50-йæ фылдæр. Ерыстæ сарæзтой Дзæуджыхъæуы администрацийы æххуысæй. Жюрийы уæнгтæ куыд фæбæрæг кодтой, афтæмæй сын хуыздæрты раиртасын æнцон нæ уыд. Уæлахиздзаутæн балæвар кодтой кубоктæ æмæ майдантæ. 20 июлы та сараздзысты скъоладзауты хсæн ерыстæ воркаутæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv