Цъæйы аразынц ног фысымуат, ныртæккæ дзы 10 агъуысты сты цæттæ æмæ ифтонггонд

Цъæйы аразынц ног фысымуат. Ныртæккæ дзы 10 агъуысты сты цæттæ æмæ ифтонггонд. Бынат дзы ис 40 адæймагæн. Арæзтадон-аивгæнæн куыстытæ цæуынц административон хай æмæ хæрæндоны дæр. Уый тыххæй йæ телеграмм-каналы фехъусын кодта регионы разамонæг Сергей Меняйло. Йæ ныхæстæм гæсгæ, фысымуат фæнд кæнынц байгом кæнын майы бæрæгбæттæм хæстæг. Фарон, «Туризм æмæ уазæгуарзондзинады» национ проектмæ гæсгæ, Цæгат Ирыстонæн хайгонд æрцыд 130 млн сомы бæрц. Грантты фæрæзты руаджы республикæйы кæмтты фæзындзæн чысыл фысымуæттæ. Сæргълæууæг ма фæнысан кодта, ныртæккæ къабазы райрæзтæн бирæ гæнæнтæ кæй ис, уый. Егъау проекттæ æххæст кæнынц «Мамысон», «Къæхтысæр», «Алания-Парк»-ы. Уымæй уæлдай, Хъæрмæдоны комы, хæххон Дыгуры, «Мамысоны» курортмæ бацæуæнты аразынц ног фæндæгтæ. Ныртæккæ регионы туристон кластеры мастер-пъланыл кусы корпораци «Кавказ.РФ». Уæдæ республикæйы уазджытæн сараздзысты дыууæ сæрмагонд мобилон уæлæфтуаны дæр. Уыдоны уыдзæн Цæгат Ирыстоны рæсугъд бынæттæм балцвæдтæ. Туристтæ сæ рæстæг æрвитдзысты æхсызгонæй, уыимæ пайдаимæ.