Аивады райрæзт, бынæттон кондадæн æххуыс æмæ медицинон лæггæдты хæрзхъæддзинад. Парламенты сæрдар Тускъаты Таймураз уыд кусæг балцы Алагиры районы. Федта ахуырадон уагдæтты уавæртæ, фелсырон-акушерон пунктты ифонгад Уыналы æмæ Буроны. Районты Национ проектты ахадындзинадæн Тускъаты Таймураз аргъ скодта йæхæдæг. Премьер бабæрæг кодта Алагиры районы сывæллæтты аивæдты скъола, аныхас кодта педагогтæ æмæ ахуырдзаутимæ. Ныртæккæ ам ахуыр кæнынц 360 сывæллоны. Фортепиано, хореографи, нывкæнынад, адæмон инструментты къордтæ. Сывæллæттæ зæрдæргъæвдæй архайынц сæ курдиат раргом кæныныл. Уæдæ æнтыстджын сты алыхуызон конкурсты дæр. Алагиры районы чиныгдон та цалцæггон нæ уыд 23 азы. Ам ис бирæ чингуытæ - аивадон литературæ, наукон æмæ æндæр æрмæг. Сывæллæты хайадмæ та чингуытæм арбацæуы 2 мин сабийæ фылдæр. Чиныгдоны кусджыты ныхæстæм гæсгæ сын нæ фаг кæны бæстæзонынады тыххæй, стæй нырыккон чингуытæ. Уыдон фылдæр хатт фæагурынц фæсивæд. Кусæг балцы фæлгæты ма премьер бабæрæг кодта дыргъдон «Владка». Йæ фæзуат 7 азы размæ уыд заууат уавæры. Ныр ты дзы зайын кæнынц пайда дыргътæ. Проект æххæстгонд æрцыд Цæгат Кавказы федерлон зылды райрæзты программæйы фæлгæты. Куыстуаты ма фæзынд дыргътæ æвæрæн дæр 5 мин тоннæйæн. Уыналы фелсырон-акушерон пункты дæр ис æппæт хъæугæ медицинон кусæнгæрзтæ æмæ хостæ фыццаг æххуыс бакæнынæн. Медицинон уагдон лæггад кæны 119 адæймагæн. Бынативгæ медицинон комплексы руаджы фарон диспансеризацийы фæлгæты 20 бонмæ медицинон æркаст ацыдысты 315 адæймаджы - Уыналы, Зынцъары, Уæллаг Зджыды, Зæрæмæджы, Садоны æмæ Галоны цæрджытæ. Буроны фелсырон-акушерон пунктмæ дæр медицинон æххуысмæ æрбацæуынц хæстæг хъæуты цæрджытæ - 3,5 мин адæймагмæ 'ввахс. Алагиры районы социалон-экономикон райрæзты фарстатыл ныхас кодтой, бынаты цы æмбырд ацыд, уый фæлгæты. Муниципалон сконды сæргълæууæг йæ доклады куыд радзырдта, афтæмæй фарон Цаликовойы хъæуы ФАП бындуронæй сцалцæг кодтой. Фæнд ма кæнынц Сырх Ходы медицинон уагдон дæр банывыл кæнын. Ныридæгæн сбæрæг кодтой зæххы хæйттæ дæр, æрыгон техникты станцæ, стæй, кордодром арæзт кæм æрцæудзæн, уыцы бынат. Ныцион проект "Культура"-йы фæлгæты та сцалцæг кодтой Црауы культурæйы хæдзар, стæй рацарадзысты кинотеатр «Комсомолец». Аивгонд цæуынц æхсæнадон бынæттæ дæр, туризмы райрæзт хынцгæйæ. Районы сæргълæууæг ма фæнысан кодта лыггæнинаг фарстатæ дæр - дондзæуæн системæ, стæй хауæццæгтæ æмбырдгæнæнтæ. Дæллаг Уыналы цур та бакусын хъæуы æнæзакъон бырондон аиуварс кæныны фарстайыл. Æрныхас кодтой чысыл æмæ астæуккаг амалхъомадæн æххуысы гæнæнтыл дӕр. Кусæг балцы фæлгæты снысан кодтой закъонадон архайды фидæнмæ нысантæ дæр. Премьер Тускъаты Таймураз куыд загъта, афтæмæй ахæм иумæйаг куыст у ахъаззаг закъонтæм хъæугæ ивддзинæдтæ бахæссынæн. Афтæмæй та республикæйы райрæзтæн ис æппæт фадæттæ дæр.