Сæрдыгон чиныгдон

Ныры дуджы бирæ чингуытæ бакæсæн ис интернеты. Фæлæ гæххæттын чингуытæ кæсын чи уарзы, уыдоны нымæц фылдæр у. Алагиры цæрæг Хосроты Нелли бавдæлд, æмæ сывæллæттæн йæ хæдзары байгом кодта сæрдыгон библиотекæ. Æхсызгон хабарыл бацин кодтой йæ сыхæгтæ дæр. Сывæллæттæ уæдæй фæстæмæ цингæнгæйæ уайынц чингуыты хъайтартимæ зонгæ кæнынмæ. Хосроты Неллийы хæдзары сабыр никуы вæййы. Сабитæ дзы райсомæй-изæрмæ кæсынц сæ зæрдæмæдзæугæ чингуытæ. Хæдзары библиотекæ байгом кæныны фæнд сылгоймагмæ рагæй уыд. Йæ къухы бафтыд йæ фырты фæрцы. Уый йын Мæскуыйæ рарвыста сывæллæттæн литературæ æмæ худгæйæ загъта: «Уæд та хæдзары библиотекæйы байгом кæнис?». Нелли уайтагъд йæ сыхæгтимæ ауынаффæ кодта. Ахæм хъуыды сæ зæрдæмæ фæцыди æмæ цыбыр рæстæгмæ хъуыддаг сырæзти. Байгом æй кодтой кадджын уавæры, сырх лент дæр ма алыг кодтой. Ныр мæйы бæрц сæрдыгон чиныгдонмæ зæрдиагæй æрбацæуынц куыд сывæллæттæ, афтæ æрыгæттæ дæр. Чиныгкæсджытæ, æцæгæйдæр, бирæ сты. Кæд нырма Неллийы чингуыты фонд бирæ нæу, уæддæр сæм сывæллæттæ рады слæууынц. Цымыдисæй фæкæсынц сæ сæргондттæм, нывæфтыдтæм æмæ сæ бакæсынц. Иу саби йæ каст куы фæвæййы, уæд та йæ иннæ райсы. Хосроты Нелли куыд зæгъы, афтæмæй ацы хъуыддаг хорз у. Бастдзинæдтæ бæттынц иннæ библиотекæтимæ дæр. Сæ нысан та иу у - цæмæй æрыгæтты разæнгард кæной гæххæттын чиныг кæсынмæ. Нелли та фæнд кæны йæ чынгуыты нымæц фæфылдæр кæнын. Сæрдгон библиотекæ сæхгæныны фæнд кæнынц 31 августы. Арæзт æрцæудзæн цымыдисаг концертон программæ дæр. Сывæллæттæ ацæудзысты скъоламæ. Нелли та кусдзæн йæ чингуыты дуне рæсугъддæр æмæ цымыдисагдæр кæныныл. Фæндтæ бирæ. Уырны йæ, ахæм хорз хъуыддагæн фæндаг кæй ис, уый. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv