Стыр хæсты рæстæг чи фæмард, уыдоны номыл сараздзысты цыртдзæвæн

Нæ республикæйы ветеранты цæдисы уæнгтæм цалдæр азы размæ фæзынд хъæппæрис. Фыдыбæстæйы Стыр хæсты рæстæг чи фæмард хæсты быдыры æмæ æбæрæгæй чи фесæфт, уыдоны кадæн саразын егъау цыртдзæвæн. Ацы аз проектыл бæстонæй кусын райдыдтой. Уæрæсейы алы регионы дæр Фыдыбæстæйы Стыр хæсты 75-азы юбилеймæ арæзт цæудзысты кадджын мадзæлттæ. Президенты указмæ гæсгæ 2020 аз нымад уыдзæн намыс æмæ номарæн азыл. Уый хынцгæйæ, ветеранты цæдисы архайджытæ фæнд кæнынц проектыл бæстондæрæй бакусын. Къаболаты Сосланы ныхæстæм гæсгæ, Уæлахизы оркомитеты фæстаг æмбырды Битарты Вячеслав сæ ахæм хъæппæрисимæ сразы ис. Сæ размæ сын хæс сæвæрдта, юбилеймæ цыртдзæвæн байгом кæнын. Уымæ гæсгæ, не мзæххонтæй хæсты быдырæй чи нал сыздæхт æмæ æбæрæгæй чи фесæвт, уыдоны номхыгъд фæнд кæнынц фæуæрæхдæр кæнын. Адæм цæуынц ветеранты цæдисы хæдзармæ. Номхыгъдмæ хæссынц сæ ныййарджытæ æмæ хиуæтты нæмттæ. Ветеранты цæдисы куыд зæгъынц, афтæмæй Хуссар Ирыстонæй чи фæмард хæсты быдыры, уыдоны нæмттæ дæр фæнд кæнынц цыртдзæвæнмæ бахæссын. Куы йæ байгом кæной, уæд дарддæр дæр кусдзысты, цæмæй нæ истори æмæ нæ хъæбатыртæ рох ма уой. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv