Фæндаджы фæтк

Паддзахадон инспекци сывæллæтты æдасдзинадæн кæны профилактикон куыст. Дзæуджыхъæуы, Рахизфарсы æмæ Æрыдоны районты фæндаджы ахизæнты цур сарæзтой акци. Скъоладзауты республикон змæлд æмæ адæмы бархион дружинæты минæвæрттæ ахорæнтæй фæндагыл сныв кодтой рагфæдзæхсты нысæнттæ. Ныффыстой «Фистæгæйцæуæг! Фæндаджы сæрты ахизыны размæ къæрцхъусдæр у», «Фистæгцæуæг! Сывæллоны къухыл хæц» æмæ æндæртæ. Акцийы сæйраг хæс фæндæгтæм ввахс хи куыд дарын хъæуы уый адæмæн бамбарын кæнын. Активисттæ фистæгæйцæуджыты зæрдыл æрлæууын кодтой фæндаджы уæлхъус чырæ телефонтæй пайда кæнын æдас кæй нæу, уый дæр. Æнахъом сывæллæттæм та хъæуы уæлдай цæстдард. Нысæнттæ сныв кодтой фæндаггон змæлд фылдæр кæм цæуы ахæм рæтты. Фæндаггон инспекцийы управленийы сæргълæууæг Хуадонты Айвары хъуыдымæ гæсгæ нысæнттæ фæпайда уыдзысты фæндаггон фыдбылызтæ бахизынæн. Хуадонты Айвар: «Иууылдæр æй зонæм ныртæккæ алы сывæллонмæ дæр чырæ телефон кæй ис уый. Телефоны хъазгæйæ æмæ музыкæмæ хъусгæйæ сæ фæндаг рох дæр фæвæййы. Ахæм мадзалы руаджы мах фæнды сывæллæтты фæндаггон фыдбылызтæй бахизын. Нысæнттæ сныв кодтам фæндаггон змæлды æдасдзинадæн». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv