Национ дзыллон информацион фæрæзты бон сбæрæг кæндзысты Цæгат Ирыстоны

Национ дзыллон информацион фæрæзты бон ацы аз фыццаг хатт сбæрæг кæндзысты Цæгат Ирыстоны. Уый тыххæй фехъусын кодтой республикæйы сæргълæууæг Битарты Вячеслав æмæ Дзыллон информацион фæрæзты разамонджыты фембæлды. Ахæм хъæппæрис разынд Цæгат Ирыстоны Журналистты цæдисы сæрдар Хъуысаты Тимурмæ. Куыд фæбæрæг кодта, афтæмæй Национ дзыллон информацион фæрæзты бон бæрæг кæнынц 20 азы дæргъы Хуссар Ирыстоны. Снысан æй кодтой Ирыстоны фыццаг газет рухс цы бон федта, уыимæ. Цæмæй Дзæуджыхъæуы дæр ахæм бæрæгбон снысан кæной, стæй йæ куыд Хуссар, афтæ Цæгаты дæр бæрæг кæной, уый тыххæй ныхас кодтой «Медиа: Север-Юг», зæгъгæ, конференцийы дæр. Республикæйы сæргълæууæг уыцы хъуыдыйы фарс рахæцыд. Хъуысаты Тимур ма бахатыд, цæмæй республикон æмæ муниципалон газетты сæйраг редакторты, стæй сæ хæдивджыты дæр, банымайой паддзахадон, кæнæ муниципалон кусджытыл. Уыцы хъуыддагыл ныртæккæ кусынц федералон æмвæзадыл. Битарты Вячеслав ныфс бавæрдта, ацы фарстамæ йæхæдæгдæр лæмбынæг кæй æркæсдзæн, уымæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv