Хæзныдоны цæрæг Таматы Юрий амайы мæсыг

Таматы Юрий дойнаг дур лыг кодта сæрмагонд кусæнгарзы руаджы. Ӕййæфта къуылымпыдзинæдтæ. Кусæнгарз-иу уайтагъд рыгæй айдзаг æмæ-иу цыбыр рæстæгмæ æрбайхæлд. Фæлæ нæлгоймагæн йæ ныфс нæ саст. Цал болгаркæйы баивта 6 мæймæ, уый зын зæгъæн у. Абоны онг ныллыг кодта 50 тоннæйы бæрц дур. Хъæубæсты рæсугъд æмæ цымыдисаг, хæлæртты кæдæм фæхонай, ахæм бынат саразынмæ Юрий бæллыд æрыгонæй фæстæмæ. Фæлтæрддзинад исын райдыдта нырма скъоладзауæй. 5-ӕм къласы йæ хистæртæ сахуыр кодтой бандæттæ æмæ тæрхæджытæ аразын. Чысыл фæстæдæр та йæ фыдæн æххуыс кодта хæдзар амайынмæ дæр. Аразæджы сæрмагонд дæсныйад нæ райста. Фæлæ йæ уый нæ бахъыгдæрдта йæ бæллиц сæххæст кæнынмæ. 7 метры бæрзæндæн мæсыг ныридæгæн дардæй дæр бæрæг дары. Аив ын кæны йæ алыварс дæр. Сарæзта дзы хъеллаугæнæтæ æмæ асыччытæ. Æрæджы дзы ныссагъта дидинджытæ. Фæзындзæн ма дзы бандæттæ æмæ рухсытæ. Мæсыг самайын æнцон хъуыддаг нæу. Дур сæвгæнын, æрбаласын. Юрийæн æппынæдзух æххуыс кæнынц йæ кæстæртæ. Йæ фырт Тигранæн йæ фыды хъуыды йæ зæрдæмæ тынг фæцыд æмæ балæууыд йемæ æмархайд кæнынмæ. Мæсыг амайын Юрий райдыдта йæхи хардзæй, фæлæ йæм фæстæтæр фæкæсджытæ дæр разынд. Баххуыс ын кодтой æхцайы фæрæзтæй. Хæрзгæнджыты нæмттæ амайæг ныффыста дуртыл. Ахæм хуызы сын загъта бузныг. Таматы Юримæ нырма бирæ фæндтæ ис. Хæстæгдæр рæстæг æй фæнды хъæубæсты ноджы цалдæр цымыдисаг бынаты саразын. Калоты Дзерассæ