Æнахуыр лæууæн бынат

Цы видеоæрмæг уын равдисæн нæ зæрды ис, уый нæ редакцимæ æрбахауд æнæнхъæлæджы. Кæй зæгъын æй хъæуы, дисы нын нæхи дæр бафтыдта, уæдæ нæм худæг дæр фæкаст. Фæлæ… Иуныхасæй, мæнæ кæсут... Ахæм лæууæн бынат фæзынд Дзæуджыхъæуы уынгтæй иуы. Æхсæнадон транспортмæ адæм æнхъæлмæ кæсынц фæндаджы былгæрон. Тæссаг дæр у, уæдæ куыд. Шофырты нæ фæнды, цæмæй сæм уайдзæф хауа, æмæ уыйтыххæй уромынц æрмæстдæр нысангонд бынæтты. Фæлæ уе знаг мæнæ ахæм лæууæн бынатмæ бафтæд. Цалынмæ бæлццон йæ маршрутон таксимæ æнхъæлмæ кæса, уæдмæ йæхи цъыфы сæвдулдзæн. Æндæр ын цы гæнæн ис. Уæвгæ, æрлæууæн раст бынаты æвæрд æрцыд, уый дæр дызæрдыккаг у. Цыфæнды ифтонггонд куы уа, уæддæр æм заборы сæрты чи хъуамæ басæррæтт кæна? Уæддæр дзы адæм хохы къахвæдау фæндаг ныннадтой, уæдæ цы кæной? Фæлæ дзы карджын адæймаг та цы кæндзæн, гæлæбуйау заборы сæрты куыд хъуамæ спæррæст кæна. Видеороличы авторы дæр уыцы фарст цымыдис кæны. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv