Гуларты Радион ссис паддзахадон ансамбль «Симд»-ы ног аивадон разамонæг

Хуссар Ирыстоны президент Бибылты Анатолий паддзахадон ансамбль «Симд»-ы сфæлдыстадон къорды базонгæ кодта сæ ног аивадон разамонæгимæ. Хуссар Ирыстоны сгуыхт артист, паддзахадон академион ансамбль «Алан»-ы раздæры солист Гуларты Радионимæ. Паддзахады сæргълæууæг фæбæрæг кодта, фидарæй йæ кæй уырны, ансамбль ног сфæлдыстадон æмвæзадмæ кæй рацæуыдзæн. æмæ дзы сæрыстыр кæй уыдзысты, уый. Ансамблы сфæлдыстадон къордмæ фæсидти, цæмæй сæ ног разамонæгмæ хорз цæстæй кæсой æмæ йын æмбæлгæ æххуыс кæной. Президент ныфс бавæрдта, уæлæмхасæн сценикон уæлæдарæс æмæ техникон фæрæзтæй сæ кæй сифтонг кæндзысты. Уымæй уæлдай ма сын фæзындзæн хи автобус, цæмæй сын гастрольты ацæуыны фадат уа. Фембæлды архайджытæ куыд фæбæрæг кодтой, афтæмæй цæмæй ног æнтыстдзинæдтæ къухы бафта, уымæн артисттæм стыр куыст æнхъæлмæ кæсы. Ансамбылы архайджытæ цæудзысты æнæмæнг медицинон къамис. Президент дарддæр дæр къордмæ йæ цæст дардзæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv