Хæринаггæнæн комбинаты райрæзт

Кæддæр нæ республикæйы егъаудæр куыстуæттæй иу, Рахизфарсы районы хойрæгты комбинат, кусын райдайдзæн ног технологиты бындурыл. Ныртæккæ дæр зæронд бæстыхæйтты бынаты аразынц ногтæ. Амайынц дыргътæ æмæ халсартæй консервтæгæнæн цех. Гæнæн ис, æмæ тагъд рæстæджы сæ продукттæ фæзыной базарты æмæ дуканиты тæрхæджытыл. Адæм кусынц дыууæ фæлтæрæй. Иу къорд ивы иннæйы. Арæзтад иу минут дæр йæ куыстæй нæ лæууы. Беслæны хойрæгты комбинат тагъд рæстæджы ногæй скудзæн. йæ райрæзт ис фæлтæрдджын адæмы къухты. Сæ иу – Хъараты Тимур. Йæ фыд Мæирбег та комбинаты бындурæвæрджытæй иу у. Тимуры фарсмæ æрбалæууыдысты йе мцæдисонтæ æмæ йе мбæлттæ. Ног канд бæстыхай нæ уыдзæн. Комбинат ифтонггонд æрцæудзæн нырыккон кусæнгæрзтæй. Зæгъæм, продукттыл температурæйы æмæ æлхъывдады руаджы кæм бакусынц, ома автоклавы, уым хæцгæ низты микробтæ амæлынц æнæ дзымарийæ. Продукт æрдзон æгъдауæй конд æрцæуы. Цæгат Кавказы ахæм стыр куыстуат иу ран дæр нæй. Нырма уал арæзт цæуы амалхъом адæмы æхцатæй. Фæлæ сын нæ республикæйы экономикæйы министрад ныфс бавæрдта баххуыс кæнынæй. Комбинаты разамынд сæ зæрдæ дарынц, сæрмагонд программæмæ гæсгæ дзы ног уазалгæнæн камерæтæ дæр кæй балхæндзысты, ууыл. Раздæр Ирыстоны ахæм комбинаттæ уыди 10-æй фылдæр, ныртæккæ та – нымадæй цалдæр. Эксперттæ куыд зæгъынц, афтæмæй экономикæйы рæзтæн ахæм куыстуаттæ пайда сты. Амалхъом адæмы ныхæстæм гæсгæ, cæ сæйраг хæс у, кæй уадзынц, уыцы продукцимæ фæлхасгæнджыты ахастдзинад хорзырдæм аивын. Хæрзхъæд æмæ экологон æгъдауæй сыгъдæг продукт хъуамæ уа аслам. Куыст дзы нырма бирæ ис, фæлæ сæ размæвæрд нысантæ зонынц, æмæ фæллой кæнынц сæ сæххæст кæныныл. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv