Иронау сдзырдтой

Алагиры районы культурæйы хæдзары кусджытæ æрæджы дæр ма хъаст кодтой, сæ ног кинозалмæ бирæ адæм кæй нæ цæуы, ууыл. Канд сæхи зæрдæтæ сын нæ риссын кодта ацы уавæр. Хъуыддаг банывыл кæныныл бацархайдтой Алагиры районы фæсивæды минæвæрттæ сæхæдæг.  Алагиры культурæйы хæдзары - чысыл бæрæгбон. Адæмæй дзы къах бавæрæн дæр нæй. Æвдисынц дзы америкаг мультипликацион киноныв «Моанæ» ирон æвзагмæ тæлмацгондæй. Мадзал баиу кодта цалдæр фæлтæры иумæ. Стырæй-чысылæй, алкæй дæр бафæндыд йæ уæгъд рæстæг ахæм хуызы культурæйы хæдзары арвитын. Проектыл цы адæм бакуыстой, уыдонæн та уый у иттæг хорз бæрæггæнæн. Бутаты Зауыр: «Бафæндыд нæ ног цыдæр афæлварын æмæ ратæлмац кодтам азы райдийæны мульпликацион ныв «Хæдзар». Бирæты зæрдæмæ фæцыд, дыккаг мульпликацион ныв равзæрстам «Моанæ». «Моанæ»,уымæн æмæ дзы зарджытæ дæр бирæ ис,æмæ нæ фæндыд нæхи афæлварын, рауайдзæнис хуыздæр, æви нæ рауайдзæнис. Мæнмæ гæсгæ хуыздæр рауад». Уæдæ сын æххуысгæнджытæ дæр уыд. Алагиры æххæстгонд цæуы сæрмагонд проект «Æрмæг», зæгъгæ. Йæ сæйраг нысан у æрыгон курдиатджын фæсивæды фæрцы ирон æвзаджы рæзтыл бакусын. Уымæ гæсгæ сæм æрыгæттæ цы хъуыдытимæ æрбацæуынц, уыдонæй алкæмæн баххуыс кæнынæн рæстæг æмæ фæрæзтæ дæр ссарынц. Цы байтауай, уый æркæрддзынæ. Се `мгуыстад цы тыллæг радты, уымæн æвдисæн вæййы адæмы æхсызгон мидбылхудт. Мультипликацион киноныв «Моанæ»-йы цы фæлгонцтæ æвдыст цæуынц, уыдон иронау актерты руаджы не сдзырдтой. Бакуыстой сыл хуымæтæг адæм. Биноныгæй æмæ æхсызгонæй бакуыстой ууыл, цæмæй адæмы зæрдæмæ сæ хъæппæрис фæцæуа. Суанг ма йæ хицæн номæй дæр схуыдтой - проект «Зæрватыкк», зæгъгæ. Уый æнæмæнг афтæ у, ирон æвзаджы рухс фидæн фылдæр кæстæртæй аразгæ у. Уый хынцгæйæ проекты архайджытæн сæ ныфсыл ныфс æфты. Ныр уыцы «Зæрватыкк» Алагирæй хъуамæ атæха иннæ районтæм дæр. Фæнды сæ сæ куыст республикæйы алы рæтты равдисын. Фæлæ сæм кæд уымæн исты фæрæзтæ фæзына, уæд. Уæдмæ уал сæ уыцы хъуыды хъæуы фæстæдæрмæ аргъæвын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv