Бынæттæ фаг уыдзæн

Цæгат Ирыстонæн 2019 - 2021 азты федералон центрæй радих кæндзысты æхцайы фæрæзтæ, социалон нысаниуæг кæмæн ис, ахæм объектты арæзтадæн. Ныхас цæуы сывæллæттæн 9 ног рæвдауæндоныл, ныр чи ис, уыдонæй та цалдæрмæ уæлæмхасæн бæстыхæйттæ бафтауыныл. Бæлвырд рæстæджы `мгъуыдмæ республикæйы хицауад фæнд кæны рæвдауæндæттæм рад фæкъаддæр кæнын. Уый тыххæй дзырдтой Мæскуыимæ комкоммæ бастдзинады рæстæг. Видеоконференцийы Уæрæсейы хицауады сæрдары хæдивæг Татьяна Голикова ныхас кодта нæ республикæйы сæргълæууæг Битарты Вячеслав, вице-премьер Фадзайты Æхсарбег, ахуырад æмæ наукæйы министр Азымты Иринæ æмæ куыст дæттыны комитеты сæрдар Платы Альбинæимæ. Дзырдтой социалон фарстаты тыххæй. Ахуырад æмæ наукæйы министрады бæрæггæнæнтæм гæсгæ, Цæгат Ирыстоны рæвдауæндæтты бынæттæ фаг ис æрмæстдæр сывæллæтты 60%-æн. Уæрæсейы ахуырад æмæ наукæйы министрад арвыста Уæрæсейы рухстауынады министрадмæ документ. Уым фыст ис сывæллæттæн уæлæмхасæн уавæртæ саразыны курдиат. Бафтаудзыстæм ма уый, æмæ республикæйы рæвдауæндæттæм сæ радмæ æнхъæлмæ кæсынц æртæ мин сывæллонæй фылдæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv