Нæ дарддæры æрмæг та ист у Мæздæджы тыххæй. Уым бындуронæй цалцæг кæнын райдыдтой сывæллæтты музыкалон скъола. Бæстыхайыл 60 азæй фылдæр цæуы, афтæмæй йæм бæстон зылд никуы уыд. Ныр дзы ивынц æмæ ног кæнынц алцыдæр. Курдиатджын сывæллæттæн аразынц æппæт хъæугæ уавæртæ. Ахуыргæнджытæ æмæ хъомылгæнинæгтæ тынг æнхъæлмæ кæсынц, сæ уарзон скъола кæд скусдзæн, уымæ. Зæронд къулты цъæрттæ згъæлынц. Цæттæ сæ кæнынц ногæй байсæрдынмӕ, слæгъз кæнын æмæ сахорынмæ. Ноджы ма дзы баивтой æппæт рудзгуытæ дæр. Мæздæджы сывæллæтты музыкалон скъола бындурон цалцæггонд никуы уыд. Бæстыхайыл цæуы 60 азæй фылдæр. Раздæр дзы уыд парти æмæ фæскомцæдисы районы комитет. 90-æм азты дзы æрбынат кодта музыкалон скъола. Бæстыхайы баивинаг уыдысты инженерон системæтæ иууылдæр, хæдзары сæр дæр - афтӕ. Фæлæ сæйрагдæр цалцæггæнинаг уыд концертон зал. Скъолайæн ис егъау истори. Каст æй фесты 3 мин адæймагæй фылдæр. Ныртæккæ та дзы ахуыр кæнынц 330 сывæллоны. Кусы дзы цалдæр хайады. Музыкалон скъолайы бындурон цалцæг кæнынц национ проект «Культура»-йы фæлгæты. Куыстытæ хъуамæ фæуой ацы аз декабры. Афтæмæй йæ юбилейыл скъола сæмбæлдзæн аив æмæ рæсугъдæй. Биджелты Бертæ