100 азы кадæн

Йе `нусон юбилей бæрæг кæны Хæххон паддзахадон университет. Цæгат Кавказы нымад у æппæты рагондæртæй иуыл. Сæдæ азмæ дæсгай мин специалистты рауагъта. Уыдон сæ зонындзинæдтæ парахат кæнынц канд Уæрæсейы нæ, фæлæ ма фæсарæнты дæр. Абон та университеты бæрæгбоны кадæн сæ культурæйы галуаны уыдис концерт. Цавæр рауад, уый радзурдзæн нæ уацхæссæг. Хæххон Паддзахадон университеты абон уæлдай хъæлдзæгдæр уыдис. Бирæ кадджын уазджытæ дзы æрæмбырд ис. Се `хсæн республикæйы бæрнон кусджытæ, хъæууон хæдзарады, спорты æмæ культурæйы минæвæрттæ. Фенæн ма дзы уыдис ахуыргæнæндоны æмæ хæсты ветеранты дæр. Юбилейы фæдыл арфæйы ныхæстæ ракæнынмæ æрбацыд Битарты Вячеслав. Уый дæр ацы университет каст фæцис. Битарты Вячеслав "Ирыстоны Намысы" майданæй схорзæхджын кодта Аграрон университеты дыууæ кусæджы. Дыууæйæн ма дзы радта "Наукæйы сгуыхт кусæджы" нæмттæ. Ахуырады сгуыхт кусджытыл банымадтой 3 адæймаджы. 6 та райстой кады гæххæттытæ. Бæрæгбонмæ ма саккаг кодтой иннæ уæлдæр ахуыргæнæндæтты минæвæрттæ дæр. Уымæй уæлдай - Цæгат Кавказы регионты æмæ Хуссар Ирыстоны делегацитæ. Ацы хъуыддæгтæ иууылдæр æвдисæг сты уый æмæ университет нымад кæй у. Цæгат Ирыстоны иннæ ахуырады лæууы хуыздæрты `мрæнхъ. Ныртæккæ Хæххон Паддзахадон университеты къæсæрæй рахизы фæлтæрдджын специалисттæ. Уыдон хъæууон хæдзарады къабазы хъæугæ сты. Цæгат Кавказы рагондæр ахуыргæнæндоны рауагъдонты нымæц 85 мин адæймаджы у. Уыдон се `ппæт дæр сты хъæугæ специалисттæ. Фыдæбон кæнынц æрмæст нæ республикæ æмæ Уæрæсейы нæ, фæлæ ма суанг фæсарæнты дæр. Университеты къæсæрæй рахызт бирæ зындгонд адæм - ахуыргæндтæ, бæрнон кусджытæ. Ныртæккæ дзы ис 10 факультеты, ахуыр та дзы кæнынц 6000 адæймагæй фылдæр. Ацы аз сæ бæрæгбоны кадæн уæлдæр ахуыргæнæндоны цыдысты кадджын мадзæлттæ æмæ равдыстытæ. Уымæй уæлдай ма - зонадон-практикон конференцитæ, семинартæ æмæ сæрмагонд лекцитæ. Суанг ма университеты историйы чиныг дæр рауагътой. Хъуамæ йæ нырма бирæ фæлтæртæ кæсой. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv