«Сызгъæрин фæззæг»

Мæскуыйы дарддæр цæуы уæрæсеаг юбилеон агропромышленнон равдыст «Сызгъæрин фæззæг», зæгъгæ. Цæгат Ирыстон равдыста нæ хуыздæр 60 куыстуаты продукци. Ахсджиаг хабар ма уый у, æмæ Цæгат Кавказы рæзты корпораци, стæй нæ республикæйы егъаудæр куыстуæттæй иуимæ бафыста æмгуыстады бадзырд. Хорз хъуыддаг æрцыдис абон. Мæскуыйы цы агропромышленнон равдыст «Сыгъзæрин фæззæг» арæзт æрцыд, уый хъæууон хæдзарады минæвæрттæн у стыр æххуыс. Сæ авналæнтæ сын кæны дзæвгар парахатдæр. Зæгъæм, нæ республикæйы егъаудæр куыстуат Мастер-Прайм Березкæ ацы равдысты йæхи хорз æмæ зæрдæмæдзæугæйæ кæй равдыста, уый тыххæй йын ныр Цæгат Ирыстоны рæзты корпорациимæ бадзырд бафыссыны гæнæн фæцис. Проекты сæйраг нысан уыдзæн аграрон æхсæнады авналæнтæ фæуæрæхдæр кæнын. Фылдæр æргом здахдзысты ацы цардыуаджы къабазы нырыккон технологитæй пайда кæныны хъуыддагмæ. Сæйраг хъæууон-хæдзарадон форумы — Уæрæсейы 60 регионæй минæвæрттæ, 15 та — фæсарæнтæй. 2018-æм Уæрæсейы Японийы азыл нымад кæй у, уымæ гæсгæ ацы бæстæ ссис канд равдысты кадджын уазæг нæ, фæлæ ма йæ ирддæр архайджытæй иу. Япойнаг специалисттæ сарæзтой цымыдисаг семинартæ, радзырдтой хъæууон хæдзарады рæзтыл нырыккон технологитæй архайыны тыххæй. Уыцы фæтк ма сæххæст кодтой 70 куыстуатæй фылдæр. Кæд кусæнгæрзтæй кæцыдæртæ уæззау æмæ егъау уыдысты, уæддæр сæ фенын кодтой. Зæгъæм, хойраджы культуртæ сыгъдæггæнæн техникæ. Йæ хъомыс у сахатмæ 50 тоннæй 400 тонны онг. Цæгат Ирыстон дæр хъæууон хæдзарадон равдыстмæ афтид къухæй нæ сæмбæлд, æрласта нæ рæсугъд культурæ æмæ традициты æвдисæнтæ, стæй хъуыстгонд ирон чъиритæ. Цæгат Ирыстоны экспозици кæм æрбынат кодта, уым адæмæй къах бавæрæн дæр нæ уыд. «Стыр бузныг уын зæгъын ирон чъиритæ кæй æрхъуыды кодтат уый тыххæй. Бирæ мæскуыйæгтæ уæ чъиритæ цы ад кæнынц уый дæр нæ зонынц», — Елена Сугробова. «Алы аз дæр ардæм æрбацæуæм æрмæсдæр цæмæй ирон чъиритæй саходæм. Тынг хæрзад вæййынц. Сæ ад сын ферох кæнæн нæй», — Вера Меркушкина. Цæгат Ирыстон фестивалы уазджыты æмæ архайджыты цымыдисы æфтауы. Национ кæфтытæм кæсæг адæмы цæстытæ цæхæр акалынц, къæхтæ та сæхи æгъдауæй мидбынаты музыкæйы зæлтæм змæлын райдайынц. Агропромышленнон равдыст «Сыгъзæрин фæззæг» арæзт æрцыд 20-æм хатт. Кæддæриддæр æм æрбамбырд вæййынц хуыздæртæ. Йæ архайджытæ дзы канд кæрæдзийы нæ фенынц, фæлæ ма сæ фæлтæрддзинадæй дæр рæдау хай бакæнынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv