Культурæйы кусджыты профессионалон бæрæгбон

Культурæйы кусджытæн абон у сæ профессионалон бæрæгбон. Уæлдай кадджын бон у музейты, чиныгдонты, культурæйы хæдзæртты æмæ галуанты кусджытæн. Уыимæ ма сфæлдыстадон æмæ аивадон къордтæн дæр. Арфæйы ныхæстæ сын бæрæгбоны фæдыл ракодта Цæгат Ирыстоны сæргълæууæг Битарты Вячеслав. Куыд фæнысан кодта, афтæмæй культурæйы кусджытæн сæ æмархайд пайдайæг у. Культурæйы райрæзтмæ егъау æвæрæн хæссынц фысджытæ дæр. Куыд æрыгæттæ, афтæ зындгонд æмæ бирæ азты лæггад чи кæны, ахæмтæ. Ирыстоны курдиатджындæр поэттæй иу, Къадзаты Станислав кæддæриддæр ис афойнадыл йæ куысты бынаты. Ныр къорд азы йæ хъæлæс хъуысы Цæгат Ирыстоны радиоуылæнтыл. Уый йæ цымыдисаг равдыстыты фæрцы æргом кæны нæ царды ахсджиагдæр фарстатæ. Уæдæ ма уыимæ у, рæстдзинадыл чи дзуры, ахæм адæймаг, уый та зыны йæхи фыст æмдзæвгæты. Къадзаты Станиславы æмдзæвгæты фыццаг æмбырдгонд рацыд 1990 азы. Уый фæстæ ма ныффыста бирæ алыхуызон рæсугъд æмдзæвгæтæ, уацтæ. Уæдæ ма уымæй уæлдай Станиславы æмдзæвгæтыл ныффыстой зарджытæ дæр. Зæгъæн ис, æмæ Кадзаты Снатислав у нæ республикæйы зынгæдæр поэттæй иу. Рæстдзинадимæ æмдзу кæнгæйæ рухс кæны кæстæрты курдиат. Уыдоны хыгъдмæ бахæссæн ис Гасанты Валерийы дæр. Уый кусы газет «Рӕстдзинад»- ы хистæр уацхæссæгæй. У æрыгон поэт. Йæхæдæг нын куыд радзырдта, афтæмæй уый йæ фыццаг æмдзæвгæ ныффыста 1995 азы, уæд ма скъолайы ахуыр кодта. Йæ ахуыргæнджытæ æмæ йæ алфæмблай цы адæм уыд, уыдоны фæрцы райдыдта фыссын. «Мæ уды зарæг», «Æрфæны фæд», «Æргом зæрдæйы лæвар». Алы чиныджы дæр зыны йæ æгæрон сфæлдыстад. Гасанты Валерий йæ æмдзæвгæты æргом кæны æхсæнады фарстатæ дæр. У УФ-ы журналистты цæдисы уæнг, Абайы Васойы стипендийы номыл дыууæ хатты лауреат, Хъамбердиаты Мысосты номыл 1-аг республикон æрыгон литераторты конкурсы дипломант. Нæ республикæйы ис бирæ хорз кæстæртæ. Алчидæр сæ архайы йæ райгуырæн бæстæйы райрæзтыл. Габолаты Зауырбег ныртæккæ кусы нæ республикæйы Хæххон паддзахадон аграрон университеты. Йæ къабазы у дæсны специалист. Фæлæ йе ‘рвылбоны куысты ссары рæстæг сфæлдыстадæн. Уый фыссы æмдзæвгæтæ. Ныры дуджы курдиатджындæр адæмты хыгъдмæ бахæссæн ис абоны æрмæджы архайджыты. Алкæй дæр сæ фæнды лæггад кæнын Ирыстонæн. Поэзийæн та мæлæн нæй, целынмæ ахæм адæм уа не ‘хсæн, уæдмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv