Дзæуджыхъæуы æрымысыдысты Фыдыбæстæйы Стыр хæсты хъæбатырты. Номарæн мадзал ацыд Намысы аллейы. Хицауады уæнгтæ, æхсæнадон организациты минæвæрттæ, республикæйы цæрджытæ - се 'ппæт дæр сæ хæсыл банымадтой Ирыстоны хъæбатырты æрымысын. Фыдыбæстæйы стыр хæсты иу тох дæр ахæм нæй, ирон хъæбатыр фæсивæд кæм нæ фесгуыхтысты. Фашистон Германыл фæуæлахизы боны кадæн Фыдыбæстæйы Стыр хæсты номыл конд монументтæ æмæ цыртдзæвæнтыл сæвæрттой дидинджытæ. Номарæн мадзал ацыд Намысы мемориалы, архайдта дзы республикæйы сæргълæууæг Сергей Меняйло. Хъæбатырты рухс ном ссарынмæ ма æрбацыдысты Хицауад æмæ Парламенты минæвæрттæ, нæ горæты администраци, 58-æм æфсад æмæ барадхъахъхъæнджытæ. Уымæй уæлдай, политикон æмæ æхсæнадон организациты минæвæрттæ, горæты цæрджытæ. Мадзалы фæзуатыл сарæзтой сæрмагонд равдыст дæр. Уым фенæн уыд, Фыдыбæстæйы стыр хæсты рæстæджы цы дзауматæ æмæ хæцæнгарзæй пайда кодтой, уыдон. Сарæзтой ма быдырон хæрæндон. Уыцы уалдзæг… Уыцы Уæлахиз… Цас æм фæцыдыстæм! 1 418 боны æмæ æхсæвы! Хъæбатыр æмæ лæгдзинады бонтæ уыдысты уыдон! Райгуырæн зæххы сæрвæлтау йæ цард чи нæ бавгъау кодта, уыдоны нæмттæ абон, 78 азы фæстæ дæр, рох не сты.