Мидхъуыддæгты министрады кусджытæ сывæллæтты æдасдзинадæн сарæзтой профилактикон мадзал

Мидхъуыддæгты министрады кусджытæ сывæллæтты æдасдзинадмæ æппынæдзух се `ргом здахынц. Арæх аразынц профилактикон мадзæлттæ. Сæ иу абон ацыд Мæздæджы районы. Мидхъуыддæгты министрады æхсæнадон советы уæнгтæ æмæ пъæлицæйы кусджытæ сарæзтой сывæллæттæн æдасдзинады уроктæ. Радзырдтой сын сæрмагонд уагæвæрдтæ куыд æххæст кæнын хъæуы, уый. Ног ахуыры аз йæ бæрны бацыд. Сæрдыгон æнæмæт рæстæг фæстейы аззад. Мæздæджы Сабырдзинады уынджы цæрджытæ сæрдыгон каникулты архайдтой мидхъуыддæгты министрады хайады æхсæнадон советы акцийы «Каникулы с общественным советом», зæгъгæ. Æхсæнадон архайджытæ Мæздæджы æрыгон цæрджытæн сарæзтой æцæг бæрæгбон. Николай Дерменжи, Мидхъуыддæгты Министрады Мæздæджы районы пъæлицæйы хайады æхсæнадон советы сæрдар: «Хæдзары кæрты сывæллæттæ æрвитынц бирæ рæстæг. Мах æхсæнадон архайджыты бафæндыд, цæмæй сабитæ сæ уæгъд рæстæг пайдаимæ арвитой. Ахæм хуызы æхсæнадон советы тыххæй адæм фылдæр зондзысты. Хъусгæйæ нæ, фæлæ хъуыддагтæм гæсгæ. Уый тыххæй аразæм ахæм цымыдисаг фембæлдыдтæ».  Конкурсон программæйы размæ сывæллæттæн сарæзтой æдасдзинады урок. Уымæй уæлдай ма фæсивæдæн радзырдтой пъæлицæйы дæлхайæдты чи цавæр куыст кæны, уый тыххæй. Уый фæстæ райдыдтой конкурсы хæслæвæрдтæ. Викторинæтæ æмæ тренингтæ сывæллæттæн бацæттæ кодта æхсæнадон советы уæнг Хæтæгты Лидия. Йæ ныхæстæм гæсгæ, сывæллæтты рагацау ахуыр кæнын хъæуы къорды архайыныл. Цæмæй бирæ адæмы раз сæ хъуыды зæгъынмæ сæ ныфс хæссой. Хæтæгкаты Лидия, Мæздæджы районы пъæлицæйы хайады æхсæнадон советы уæнг: «Фембæлдтæ саразæн ис алыхуызон æууæлтыл. Хистæр кары сывæллæттимæ саразæн ис тренинг "Парламентские дебаты", зæгъгæ. Афтæмæй хъазты хуызы æрныхас кæнын, наркотиктæ цавæр зиан хæссынц, уый тыххæй. Уыимæ ма коррупцийы тыххæй дæр. Фæлæ уый æндæр æмвæзад у. Абон мах бакуыстам, цæмæй сывæллæттæ иннæты ’хсæн сæхи раст дарын зоной». Фембæлды кæронбæттæн æхсæнадон уæнгтæ архайджытæн байуæрстой сæлдæгтæ.  Пъæлицæйы дæлхайадтæ æхсæнадон советы уæнгтимæ  дарддæр  дæр иумæйаг мадзæлттæ араздзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv