Цæгат Ирыстонмæ пресс-туры фæлгæты ссыдысты фæсарæйнаг журналисттæ

Цæгат Ирыстонмæ ссыдысты фæсарæйнаг журналисттæ Япони, Испани, Чехи, Казахстан, Венгри æмæ Араббаг Эмираттæй. Фæсарæйнаг журналисттæн ацы балц арæзт æрцыд Цæгат Кавказы хъуыддæгты министрад æмæ информацион агентад ТАСС-ы хъæппæрисæй. Йæ сæйраг нысан – Цæгат Кавказы Федералон зылды республикæтæ туристтæн сцымыдис кæнын. Игнасио Ортега фæлтæрджын журналист у. 14 азы кусы испайнаг информацион агентад ЭФЭ-йы уацхæссæгæй Мæскуыйы. Цæгат Ирыстонмæ фыццаг хатт ссыд. Куыд зæгъы, афтæмæй Цæгат Ирыстоны традицитæ æмæ уырнынад хæстæг лæуынц Арменимæ. Гыццыл горæттæ бæрæг дарынц сæ царды фæзилæнтæй. Информацион агентад «EFE»-йы уацхæссæг (Испани) Игнасио Ортега: «Уæ хæринаг тынг хæрзад у. Мæскуыйы ахæм хæринæгтæ нæ зонынц кæнын. Æз æрмæст чъириты кой нæ кæнын ныр. Уыдон хæрзад сты, уый алчидæр зоны. Пъæмидортæ, дзидза, дзул уымæй дæр ма тæвдæй. Алцыдæр иттæг хорз у – зæрдиагæй уын зæгъын. Æнæмæнг ма мæ бафæнддзæн ноджыдæр ардæм æрцæуын». Цæгат Кавказ канд Европæйы цæрджыты не сцымыдис кодта, фæлæ ма скæсæны бæстæты дæр. Муртада Карим ныр 23 азы Ирак æмæ араббаг информацион агентады ифтонг кæны алыхуызон хъусынгæнинæгтæй. Фæлтæрдджын журналист йæ уал азы куысты сæрты кæсгæйæ бафиппайдта, ацы балцæн цы нæ фаг кодта, уый, æмæ ма йæ цы фæнды базонын, уый дæр. Газет «Аль халидж»-ы уацхæссæг (Иугонд Араббаг Эмираттæ) Муртада Карим: «Уæрæсеимæ фæсарæнты фæнды æмгуыстад кæнын. Йæ амалхъомдзинады гæнæнтæ йын инвестортæ фæпарахатдæр кæниккой, бирæ сты. Фæлæ уын уæ паддзахады тыххæй бирæ кæй нæ зонынц, уымæ гæсгæ сæ ныфс тынг нæ хæссынц». Чехаг газеты уацхæссæг Ирджи Юст Дзæуджыхъæуы фыццаг хатт нæй. 2012 азæй нырмæ йæ Аланты зæхх йæхимæ `лвасы, фыццаг хатт Цæгат Ирыстонмæ уæд æрцыд. Йæ алы балцы фæстæ дæр фæкæны хатдзæгтæ, ныр дæр та – афтæ. Горæт, дам, фæаивдæр. Газет «Тискали»-йы уацхæссæг (Чехи) Иржи Юст: «Горæт фæнырыккондæр. Мæнмæ гæсгæ, уæм федералон центр дæр йæ цæст дары. Бæрæг у. 6 азы размæ куы уыдыстæм Цæгат Ирыстоны, уæдæй абонмæ фæндæгты хæрзхъæддзинад фæхуыздæр. Дзæуджыхъæу цымыдисаг у. Рæсугъд горæт, зæрдæхæлар адæм, уазæгуарзон. Уый сæйрагдæр у». Зæгъын хъæуы уый, æмæ фæсарæйнаг журналисттæн ахæм цымыдисаг балц саразын бантыст Цæгат Кавказы хъуыддæгты министрад æмæ информацион агентад ТАСС-ы руаджы. Ахæм хорзæх сын фыццаг хатт нæ сарæзтой. Ацы аз уал августы уыдысты Кæсæг-Балхъар, Хъæрæсе-Черкеси æмæ Стъараполы. Балцы сæйраг хъуыды у Цæгат Кавказы федералон зылды республикæтимæ фæсарæйнаг минæвæртты базонгæ кæнын. Информацион агентад ТАСС-ы специалист Алена Нефедова: «Фæнды нæ равдисын Цæгат Кавказы хъæздыгдзинæдтæ. Иухуызон кæй нæу, уый. Уымæ гæсгæ сын æвдисæм алыхуызон республикæтæ, цæмæй дзы алкæмæн дæр аккаг аргъ скæной. Бамбарой, зæгъыны аккаг канд не `рдзон хæзнатæ кæй не сты, фæлæ ма нæ культурон хъæздыгдзинæдтæ дæр. Афтæмæй канд уæрæсеаг туристтæ нæ тырндзысты ардæм, фæлæ ма фæсарæйнаг бæстæты минæвæрттæ дæр». Дзæуджыхъæумæ ацы хатт 10 журналисты ссыд. Цæгат Ирыстонæй ацæудзысты Цæцæны республикæмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv