Тугцъир сасчъытæ

Иучысыл куы фæхъарм вæййы, уæд джыбытæ бацин кæнынц – сæхи та хорз фендзысты, зæгъгæ. Хъыгдарынц Уæрæсейы æппæт регионты цæрджыты дæр. Уæдæ Цæгат Ирыстойнæгтæ дæр æдас раны не сты. Адæм хъаст кæнынц, джыбытæ сыл кæй хæцынц, ууыл. Хъизæмар кæнынц цæрæгойтæ дæр, уæлдайдæр куыйтæ. Бынтон тæссаг та уый у, æмæ джыбытæ уæззау хæцгæ низтæ кæй парахат кæнынц. Хæлуарæджы тугцъир хæстæджытæй хи куыд бахъахъхъæнын хъæуы, уый радзурдзæн нæ уацхæссæг. «Чъерами ракалдта, уæд æй зонут, джыбытæ дæр райхъал сты» – зæгъынц специалисттæ æмæ сидынц адæммæ, цæмæй сæхи хахъхъæной. Уалдзæг нырма ныр райдыдта. фæлæ уæддæр ацы аз рынчындонмæ æххуысагур æрбацыд джыбытæ кæуыл фæхæцыдысты, ахæм 18 адæймаджы хæцтытимæ. Уыдонæй 12 сывæллæттæ. Ацы хатт сæ уавæр тæссаг нæ уыд – сасчъытæ уæззау низ хæссæг нæ разындысты. Хъыгагæн, алы хатт афтæ нæ рауайы. Адæймагæн йæ бон у тынг тæссаг низæй фæрынчын уæвын, æмæ йæ фыццаг æмбаргæ дæр нæ бакæндзæн. Эпидемиологон цæстдарды хайады сæргълæууæджы бартæ æххæстгæнæг Беккуызарты Фатимæ: «Адæймагæн алы хатт йæ бон базонын нæ вæййы, бандзæвыд ыл джыбы æви нæ, уымæн æмæ ацы сысчъытæ хæцты бынаты байсæрдынц сæрмагонд уырзæгæй. Уый фæстæ адæймаг рыст нал фембары. Кæд уæ буарыл исты сау стъæлфыты кæнæ къуыпп цъутхæлтты хуызæттæ фæзынд, уæд уый ууыл дзурæг у æмæ, дзы цыдæр уæ буары бабырыд». Джыбы дыл фæхæцыд, зæгъгæ, уæд адæймаг хъуамæ æвæстиатæй, æнæ ракæ-бакæйæ, бацагура дохтырты æххуыс. Кæд искæй буарыл джыбы ныффидар, уæд æй специалисттæ раппарынц æмæ йæ экспертизæмæ арвитынц. Уым сбæрæг кæнынц хæцгæ низ хæссæг у æви нæ, уый. Тæссаг куы разынма, уæд пациентæн скæнынц сæрмагонд дзæбæхгæнæн мадзæлттæ æмæ прививкæтæ. Вирусологон лабораторийы фельдшер-лаборант Нæкуысаты Залинæ: «Нырыккон системæты руаджы базонæн ис джыбы хъырымаг гемморагион тæфсæг, хурныгуылæны Нилы тæфсæг, энцефалит æмæ æндæр уæззау низтæ хæссæг, у æви нæ, уый». Джыбытæй низ хæцы æрмæст адæмыл нæ, фæлæ цæрæгойтыл дæр. Уыдоныл лыстæг тугцъириæ арæхдæр ныффидар вæййынц. Уыимæ æрмæст хъæддаг цæрæгойтыл нæ, фæлæ стуртыл æмæ æндæр хæдзары фосыл. Ветеринартæ сидынц адæммæ, куыйты æмæ гæдыты ацы афон кæрдæгмæ куыд нæ уадзой, уый тыххæй. Цæрæгойты бахъахъхъæнын зын нæу. Хъæуы сæ æрмæст сæрмагонд хостæй бапырх кæнын. Стуртæ æмæ лыстæг фосмæ та хъæуы хостæй фæкæсын. Ацы куыст нæ республикæйы ветеринарон службæтæ райдыдтой. Фæлæ æхсæнадон бынæттæ джыбытæй æдас кæнын мæйæ раздæр нæ райдайдзысты. Æнхъæлмæ кæсынц уарынты рæстæг кæд фæуыдзæн, уымæ. Зæхх уымæл куы уа, уæд æдасдзинады мадзæлттæй пайда нæ уыдзæн. Уый тыххæй уынгты кæнæ æрдзы уæвгæйæ, хъæуы къæрцхъус уæвын. Хуыздæр у æхгæд дзаума дарын æмæ сæрыхъуынтæ истæмæй æмбæрзын. Уымæн æмæ джыбытæ æрмæст кæрдæджы нæ, фæлæ ма бæлæстыл вæййынц. «Роспотребнадзор»-ы специалисттæ адæмæн æмбарын кæнынц - уавæрмæ сæ цæст дарынц. Уымæй уæлдай ма зæгъынц, джыбы куы фæхæца, уый цардæн тæссаг нæу, амæлæн дзы нæй. Джыбыты æппæты тæссагдæр хуыз – инцефалитон – республикæйы нæй. Иннæ инфекцитæ та сдзæбæх кæнæн ис. Фæлæ уæддæр джыбытæм куыдфæндыйы цæстæй кæсын нæ хъæуы. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv