Ног хид кæд уыдзæн

Алагиры районы хидтæй иу у хъæу æмæ федералон фæндаджы хсæн бастдзинад. Æрмæстдæр уыцы хиды руаджы Дæйхъæуы æмæ Æрхоны цæрджытæн фадат ис хохæй быдырмæ æрхизын. Фæлæ бынæттон цæрджытæ сагъæс кæнынц. Сæ ныхæстæм гæсгæ хид кæлæтдзаг уавæры ис. Кæдæм нæ хъаст кодтой, фæлæ иу ран дæр бæлвырд дзуапп нæ райстой. Цæгат Ирыстоны фæндæгты хæдзарады комитеты сын зæгъынц «хиды» уавæр сын у зонгæ, æмæ у сæ бæрны. Æрхоны цæрджытæ ацы хиды сæрты алы бон дæр цæуынц. Зæгъынц, сæ цардæн дæр тæрсынц. Хидæн тæссаг у ныккæлынæй. Хидæн йæ фæрстыл нæй гæрæнтæ, бетон блоктæ дæр ныппырх сты. Хид заууат уавæрмæ кæй æрцыд, уый дызæрдыккаг нæу. Бынæттон цæрджыты зæрдæ хидыл рагæй хсайы. Аст азы размæ хид сæхгæдтой. Сфæнд æй кодтой сцалцæг кæнын. Адæмæн рæстæгмæ фæндаг скодтой — Уналы алывæрсты. Фæлæ хуырæй конд фæндаг æрдзон уавæртæн бирæ нæ бафæрæзта. Адæмæн æндæр гæнæн нæ уыд æмæ та хидыл цæуын райдыдтой. Хид у æртæ хъæумæ фæндаг, æнæ уымæй дæсгай хæдзары баззайдзысты хæхты уацары. Бынæттон цæрджытæ хъаст кодтой хъæуы æмæ районы администрацитæм дæр. Фæлæ хъуыддаг нæ сæнкъуысыд. Æрхоны хъæуы цæрæг Толпарты Альбинæ: «Дзуапп мын радтой фарстайыл кæй кусынц, уый. Алы бон дæр æрбацæуынц, хидмæ æркæсынц æмæ дзы ницы хъæндзинæдтæ ссаргæйæ, фæстæмæ аздæхынц. Уый фæстæ нын загътой — æнхъæлмæ кæсæм дон кæд фæкъаддæр уыдзæн, уæдмæ. Кæрæдзийы номыртæ нын дæттынц, æмæ иуæй дæр бæлвырд дзуапп райсын нæ бон нæу». Хидмæ æвæстиатæй фæкæсын кæй хъæуы, уый зонынц республикон фæндæгты хæдзарады дæр. Фæлæ дзы сæ хъуыдымæ гæсгæ зæрдæхсаинагæй ницы ис - специалисттæ хидмæ дарынц сæрмагонд цæстæнгас. Уагдон объекты арæхтадмæ фæнд кæны ивддзинæдтæ бахæссын. РЦИ-Аланийы фæндæгты хæдзарады комитеты сæрдар Солиты Тариель: «Хидæн Проектон-сметон документаци конд у. Йæ конструкци дæр ивд æрцæудзæн. Æртæрæгъон фæндаджы бæсты дзы уыдзæн дыууæ рæгъы. Хæдтулгæтæн дзы уыдзæн æнцондæр цæуын. Донивылдæй дæр ын тас нæу. Фæндæгты фонд нын кæд баххуыс кæна, æмæ нын 2019 æхцайы фæрæзтæ радих кæна уæд фарста лыггонд æрцæудзæн». Ныр ма уал уыцы хъуыддæгтæ сты гæххæттыл фыст. Дæйхъæуы æмæ Æрхоны цæрджыты ма Цас хъæудзæн ног хидмæ æнхъæлмæ кæсын, уый ничи зоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv