Садоны цард цæхгæрмæ фæивта, цы цæугæдон дзы ис, уый куы раивылд, уæдæй фæстæмæ

Хæххон хъæуты цард раздæримæ абаргæйæ зынгæ аивта. Ууыл нæ программæты иу æмæ дыууæ хатты нæ дзырдтам. Бирæ æвдисæнтæ ис дæнцæгæн æрхæссæн. Уый дын Уæхъæц, Хъæни, Лац Камунта, Махческ, Гæлиат. Ныр бахæццæ стæм Алагиры районы Садоны хъæумæ дæр. Йæ цæрджытæ ма хорз хъуыды кæнынц, кæддæр сæм цард цæдджинагау куыд фыхти, уый. Размæ цыдысты æрзæткъахæнты куыстæй, сæ хъомыс цас уыд, уыййас. Хъыгагæн, ныр уавæр бынтон æндæрхуызон у. Садоны цард цæхгæрмæ фæивта, цы цæугæдон дзы ис, уый куы раивылд, уæдæй фæстæмæ. Йæ фæд æрмæст хъæуы нæ ныууагъта, фæлæ ма адæмы зæрдæты дæр. Ныртæккæ уыцы дæрддзæф хъæуы æххæстæй 80 адæймагмæ ввахс йеддæмæ нæ цæры. Цы цæрджытæ ма дзы баззад, уыдон куыд зæгъынц, афтæмæй хæххон æмæ хъæууон цард кæнын ныры рæстæг сси зын. Цæмæ афтæ? Уаниты Заирæ райгуырд Садоны. Йæ цард дæр ам арвыста. Йæ цæстытыл ма ирдæй уайы, æнæхъæн районы артдзæст кæй уыди йæ уарзон хъæу, уый. Советон дуджы Садонмæ цыдысты Уæрæсейы алы къуымтæй. Куыстой дзы рзæткъахæнты. Хъæуы цард æхсидгæйæ цыди. Уаниты Заирæ йæхæдæг дæр цæрæнбонты фæкуыста æрзæткъахæны. Мысы, куыд æнгом æмæ зæрдæрухс уыди сæ цард, кæд уæззау куыст кодтой, уæддæр. Фæлæ 2002-æм азы дæнцæгæн хæссинаг хъæуæн йæ цард цæхгæрмæ фæзылд иннæрдæм. Садонмæ хæстæг цы цæугæдон ис - Ходыдон - уый рагуылф кодта æмæ хъæуы цард æвваст æрмынæг. Тыхджын донивылд бирæ адæмæн сæ цæрæн бынæттæ ныууадзын кодта. Сæ фæллой сын бабын кодта. Ныртæккæ Садоны 3 бирæуæладзыгон хæдзары йеддæмæ нал ис. Уым дæр цæрджытæй дзаг нæу. Нырмæ дæр ма, хъæуы цæргæйæ чи баззад, уыдоны куы бафæрсай, цæуылнæ ацыдысты иннæтау, уæд сæ дзуаппыл иу уысм дæр нæ ахъуыды кæнынц. Кæддæры хъæздыг æмæ фæрнджын хъæуæн ныр йæ кой дæр нал ис. Ивгъуыд азты æвдисæндартæ та ма абон дæр æгомыгæй лæууынц хъæуы мидæг. Хæдзæрттæ æмæ раздæры æхсæнадон уагдæтты пырхытæ бæрæг дарынц алырдыгæй дæр. Раст цыма адæймаг исты кинонывмæ бафты, афтæ кæсы. Кæддæр адæм мæлдзгуыты гуыбаккау цы хъæуы змæлыдысты, ууыл ныр афæлгæсгæйæ, Уаниты Заирæ æмæ иннæ цæрджыты зæрдтæ дæр ныккæрзынц. Алкæй стырдæр бæллиц дзы у, раздæрау сæ хъæуы цард сног кæнын. Хъавынц уымæ сындæггай къахдзæфтæ кæнын. Садоны царджытæ зæгъынц, абон хъæуы æндæр ахорæнтæй фæлыст у. Хæдзæртты дон нæй. Зымæгон рæстæг та йæ Уæллаг Садонæй ласын бахъæуы. Уæдæ газ дæр Садоны нæй. Зымæг иу чи сугæй арт кæны, чи та- электрон радиатортæй хъарм кæны. Цы хæдзæрттæ ма баззад, уыдонæн сæ цар ивинаг сси. Уарынты рæстæг дзы дон мидæмæ тæдзынмæ фæвæййы. Фæлæ, кæд уавæртæй æххæст не сты, Садоны ма чи баззад, уыцы адæм, уæддæр сæ уарзон цæрæн бынат ницæуыл раивдзысты. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv