Зындзинæдты сæрты

Æппæтадæмон федераци ФИФА-йы хъæппæрисæй Дзæуджыхъæуы цыдис футболон спартакиадæ. Ерысты архайдтой, йе `нæниздзинад хъыгдард кæмæн у, уыцы фæсивæд. Уæлахиздзау суæвыны тыххæй спортсментæ æрæмбырд сты республикæйы районтæй. Алкæмæн дæр сæ ис йæхи хъысмæт. Спартакиадæйы æвзонг лæппутæ æрмæст сæ тыхтæ не `взарынц, ссарынц ма хæлæрттæ дæр. Бæлвырддæр уын хабæрттæ радзурдзæн нæ уацхæссæг. Гæмæонты Игоры командæ хуыздæрты æмрæнхъ ис. Сæ ныхмæ лæууæг командæты арæх рамбулынц. Ныр дæр та афтæ. Игорь футболæй 20 азæй фылдæр хъазы. Уый размæ уыд професионалон хъæбысхæстæй богал. Фæлæ, хъыгагæн, 1995 азы æвзонг лæппуйы цард къæссавæлдæхт фæцис. Йæ къахыл нæмыг суад. Уыцы цау æвзæр фæстиуджытæм расайдта - йæ къах ын алыг кодтой. Лæппу зындзинæдты цур йæхимæ хъусыныл нæ фæцис. Цард уарзы. Протез куы сæвæрдта, уæдæй нырмæ йæхи спорты хуызты фæлвары. Игорь Гамаонов: Мæн фæндыд базонын йе `нæниздзинад хъыгдард кæмæн у, ахæм адæмæн сæ бон сæхи цы спорты хуызы бавзарæн ис? Лæппутæй мын кæйдæр телефоны номыр радтой. Бадзырдтон æм. Æмæ уæдæй абонмæ футболæй хъазын. Фыццæгты йын тынг зын уыдис. Æнцойгæнæнтыл згъорын нæ, фæлæ лæууын дæр нæ зыдта. Йæхиуыл куыста æмæ йæ фыдæбæттæ дзæгъæлы нæ фесты. Гæмæонты Игорь бирæ хæттыты ссис алыхуызон ерысты уæлахиздзау. Игорь Гамаонов: «Дунеон, Европæ æмæ Уæрæсейы чемпионаттæ, президенты номыл кубок - се `ппæт ерысты дæр бирæ хæттыты архайдтон. Уæдæ сæ уæлахиздзау дæр сдæн». Æрыгон лæппутæн Игорь фæзминаг у. Проект «Футбол во имя надежды»-йы фæлгæты нæ хъайтар паралимпаг командæимæ æнæхъæн аз цыдысты республикæйы скъолатæм. Йе `нæниздзинад хъыгдард цы лæппутæн у, уыдонæн æвдыстой спорты хи æвзарыны гæнæнтæ. Сæ ныфс сын сæттын нæ уадзынц. Проекты кæронбæттæн сарæзтой ерыстæ. Фæсивæд сæ тыхтæ æвзæрстой дартсы, стъолыл хъазгæ теннисæй æмæ æндæрты. Ерысты амидингæнджытæй иу у æхсæнадон организаци «Независимая жизнь»-ы разамонæг Сергей Саутин. Куыд зæгъы, афтæмæй турнир дæтты хорз фадæттæ хи равдисынæн. Уымæй уæлдай ма ерысты архайджытæ сæхицæн ног хæлæрттæ ссарынц. Сергей Саутин: «Мах сфæнд кодтам дыууæ проекты баиу кæнын. Фыццаджыдæр, инвалидты спортивон клуб «Стимул» цы ерыстæ аразынц, уыдон, æмæ ног ФИФА-йы проект «Футбол во имя надежды»-йы». Проект Цæгат Ирыстоны фыццаг хатт нæ сарæзтой. Хъуамæ æрвылазон суа. Йе `нæниздзинад хъыгдард кæмæн у, уыдон æй хъуамæ `мбарой - царды авналæнтæ æгæрон сты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv