Уæлахизы боны агъоммæ

Дзæуджыхъæуы уыд хъæбатырдзинады урок. Сарæзтой йæ тæрхондоны пъырыстыфты Цæгат Ирыстойнаг управлени, 11-æм скъолайы ахуырдзаутæ æмæ республикæйы ветеранты Советы уæнгты хъæппæрисæй. Скъоладзаутæ бакастысты хæсты тыххæй æмдзæвгæтæ, азарыдысты тематикон зарджытæ. Æрбацæуджытæн ма равдыстой хæсты тыххæй видеоæрмæджытæ дæр. Мадзал у æрвылазон. 11-æм скъолайы ахуырдзаутæ дзы æппынæдзух фæархайынц. Бацæттæ кæнынц, хæсты чи архайдта æмæ рохуаты чи аззад, уыцы хæстонты тыххæй æрмæджытæ. Мадзалы ма архайдтой мидхъуыддæгты министрады æмæ тæрхондоны пъырыстыфты Цæгат Ирыстойнаг управленийы ветерантæ, æхсæнадон организациты минæвæрттæ. Ацы хатт сæ суазæг кодтой профцæдисы уæнгтæ дæр. Мидхъуыддæгты министрады вокалон ансамбль æрбацæуджытæн акодта зарджытæ. Мадзалы сæйраг хæс у фæсивæды патриотон æнкъарæнтæ равзæрын кæнын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv