Дзæуджыхъæуы администраци Ног азы агъоммæ расидтис сæрмагонд конкурс

Ног азы бæрæгбонмæ йæ хæдзар чи рæссугъддæр саив кæндзæн. Ахæм сæрмагонд конкурс радистысты Дзæуджыхъæуы. Бацархайыны фадат дзы ис алкæмæн дæр. Хуыздæр чи банывыл кæндзæн бæстыхай – уымæн аргъ кæндзæн сæрмагонд къамис. Фыццаджыдæр кæсдзысты цы аивдзинады хъуыдыдтæ фæзынд адæммæ æмæ сæ куыд самал кодтой, уыимæ ма чи хуыздæр, уымæ. Ног азы бæрæгбонмæ бирæ нал баззад. Кæй æрбахæццæ кæны, уый бæрæг у горæтыл афæлæгæсгæйæ дæр. Татьяна Бабенко Ног азмæ аивгæнæн дзаумæттæ амал кæны. Фæнды йæ хæдзар йæ уарзондæр бæрæгбонмæ барæсугъд кæнын. Канд Дзæуджыхъæуы нæ райдыдтой бæрæгбонмæ цæттæ кæнын. Нæ республикæйы алы горæты æмæ хъæуы дæр Ног азмæ аив кæнынц уынгтæ, хæдзæрттæ.  Зæгъæм, Æрыдоны бæрæгбоны заз бæлас сывæрдтой. Беслæны та 3 боны фæстæ райдадзæнис конкурс. Бæрæг дзы кæндзысты йæ хæдзар Ног азмæ рæсугъддæр чи саив кæндзæн, уыдоны. Конкурсы архайджытæн аргъ кæндзысты цалдæр къæпхæнмæ гæсгæ. Хæдзар Ног азмæ хуыздæр чи саив кæна, уыдонæн ратдзысты зæрдылдарæн лæвæрттæ æмæ æхцайы премитæ. Фарон хуыздæрыл банымадтой Алагиры цæрæджы. Гирляндæтæ, хъазæнтæ æмæ алыхуызон анимацитæй аивгонд уынджы кадртæ интернеты апарахат сты. Ацы аз Дзæуджыхъæуы цæрджытæ фæнд кæнынц конкурсы фæуæлахиз уæвын. Æркасты бацархайын кæй фæнды, уыдоны бон у сæ курдиат горæты администрацимæ бадæттын. Горæты сæйраг уынгтæ дæр цæттæ кæнынц Ног азмæ. Сабырдзинады проспект дæр тагъд рæсугъд кæнын райдайдзысты. Ацы аз бæрæгбоны хирхæфсæн фæзтæ фылдæр уыдзысты. Сæрдыгон эстрадæ «Ракушкæ»-йыл сараздзысты концерт. Бæрæгбоны мадзæлттæ раздæрау иу бон нæ уыдзысты. 21 декабры Сабырдзинады фæзыл фæзындзæн республикæйы сæйраг заз бæлас. Цалдæр боны фæстæ та байгоам уыдзæн Митын Дадайы хæдзар. Уыимæ ма, Ларсы саразадзысты бирæ цымыдисаг армукъатæ. Конкурсы бацархæйын кæй фæнды, уыдон та хъуамæ 23 декабыр онг видеоæрмæг арвитой горæты администрацийы культурæйы хайады электрон постмæ. Уæлахиздзауты сбæрæг кæндзысты сæрмагонд къамисы уæнгтæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv