«Ногдзау»-ы конкурс

Журнал «Ногдзау» у Ирыстоны мыхуыры хистæртæй иу. 82 азы йæ кусджытæ фæлтæрæй-фæлтæрмæ архайынц, цæмæй журналы алы ног номыр дæр уа цымыдисаг æмæ зæрдæмæдзæугæ. Ахæм хъуыдыимæ дзы кусынц абон дæр. Ног рубрикæтæ æмæ проекттæ расайдтой стыр конкурсмæ. Сбастой йæ Хетæгкаты Къостайы 160 азы райгуырды бонимæ. Йæ сæйраг хæс у ирон æвзаг æрыгон фæлтæры `хсæн парахат кæнын. Дзæуджыхъæуы национ наукон чиныгдоны скъоладзаутæ æвдисынц сæ курдиат. Уыцы фадат сын радта сывæллæтты журнал «Ногдзау». Цы сæрмагонд конкурс расидт, уым архайдтой 129 скъоладзауы. Сæ дæсныйадæн сын аргъ кодтой жюрийы уæнгтæ. Журналы кусджыты иу фæлтæр кæд иннæйы ивы, уæддæр сæ сæйраг хъуыды иумæ размæ хæссынц. Цымыдисаг æрмæджытæ æмæ рубрикæтæй сывæллæтты зонгæ кæнынц ирон æгъдæуттæ æмæ культурæимæ. Сæ куыстмæ куыдфæндыйы цæстæй нæ кæсынц. Пайда кæнынц куысты ногдзинæдтæй. Нырыккон дугимæ дæр уæдæ кæнынц æмдзу. Конкурсы архайын сæ бон уыд 6 азæй 15 азы онг кæуыл цæуы, ахæм скъоладзаутæн. Сæ куыстытæ æрбарвыстой «Ногдзау»-ы электрон адрисмæ. Сабитæ сæхи фæлвæрдтой 7 номинацимæ гæсгæ: æмдзæвгæ, аргъау, радзырд, æмбисонд, мæ мыггаг, мæ хъæу æмæ хъæлдзæг ныхæстæй. Бынат дзы уыдис театралон инсценировкæтæн дæр. Æркаст сабитæн фадат дæтты канд сæ курдиат равдисынæн нæ, фæлæ ма ног хæлæрттæ дæр ссарынæн. Конкурсы чи архайдта, уыдоны куыстытæ мыхуыргонд æрцæудзысты Ногдзауы дарддæры номырты. Се хсæн Хуссар Ирыстоны минæвæрттæ дæр. Зæгъæн ис, æмæ «Ногдзау» ирон æвзагыл дзыллон информацион фæрæзты `хсæн уæлдай бынат ахсы. У сывæллæттæн уарзондæр. Кæсгæ йæ уæвгæ алы кары адæм дæр кæнынц. Конкурс та журналы куыстмæ у хорз бавæрæн. Уæлахиздзауты дзы схорзæхджын кодтой кады гæххæттытæ æмæ æхцайы фæрæзтæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv