Ног гæнæнтæ

Дзæуджыхъæуы вагæттæ цалцæггæнæн завод иннæ аз сцалцæг кæндзæн 97 вагоны. Уый фаг у, цæмæй завод æнæ хъæндзинæдтæй куса æнæхъæн афæдз. Цалдæр азы размæ куыстуат сæхгæныны къæсæрыл уыд. Уæд хъуыддаг йæхи бæрны бакодта нæ республикæйы сæргълæууæг Битарты Вячеслав. Йæ къухы бафтыд заводæн фаг куыст ссарын, стæй ма ног кусæн бынæттæ саразын. Абон ныхас цæуы завод нырыккон домæнтæм гæсгæ рацаразыныл, цæмæй йæ авналæнтæ фæуæрæхдæр уой. Былвырддæр - нæ дарддæры æрмæджы. Раздæрау хуыздæрты æмрæнхъ куыстуат цæмæй æрлæуа, уый у Дзæуджыхъæуы вагæттæ цалцæггæнæн заводы фæллойгæнджыты сæйрагдæр бæллиц. Ныртæккæ уæззау рæстæджытæ 'ййафы. Куыст фаг нæй. Завод хъæуы нырыккон æууæлтæм гæсгæ сифтонг кæнын, цæмæй ног вагæттæ уадзын райдайа. Вагæттæ цалцæггæнæн завод ног домæнтæм гæсгæ рацаразыныл ныхас рагæй цыд. Фыццаджыдæр, уыцы хъуыддаг заводы кусджытæн ахсджиаг у. Уымæн æмæ уый руаджы фæзындзæн фадат сæ мызд фæфылдæр кæнынæн, уыимæ ма ног кусæн бынæттæ саразынæн. Нæ завод уæлдай зын уавæры фæстаг 4 азы ис. Куыст фаг нæ уыд. Уымæ гæсгæ, кæм къуыри æртæ боны куыстам, кæм та къуыригæйттæ æнцад лæууыдыстæм. Заводы уавæр хуыздæрырдæм раивынмæ схæццæ сты федералон бæлццæттæласæн компанийы минæвæрттæ. Фæнд кæнынц ног хуызы вагæттæ цалцæг кæнын Дзæуджыхъæуы куыстуаты. Сæ фадæттæ сты уæрæхдæр, ифтонг сæ кæнынц кондиционертæй. Ахæм вагæттæ араздзысты æппæт Уæрæсейы дæр. Кыстуаты уавæрмæ се `ргом аздæхтой паддзахадон думæйы депутат Таймазты Артуры руаджы. Йæ курдиатмæ гæсгæ заводы цехтæм, стæй йæ финансон æмæ экономикон бæрæггæнæнтæм сæ цæст æрдардтой специалисттæ. Уазджытимæ фембæлд нæ республикæйы сæргълæууæг Битарты Вячеслав дæр. Ныфс бавæрдта, æппæт хъæугæ мадзæлттæ арæзт кæй æрцæудзысты, цæмæй завод ногæй æркуса æмæ раззагдæрты æмрæнхъ æрлæууа, уый тыххæй. Дзæуджыхъæуы вагæттæ цалцæггæнæн заводыл хæрзæрæджы сæххæст 100 азы. Ныртæккæ куыстуаты фæллой кæнынц 500 адæймаджы. Фидæны завод нырыккон æууæлтæм гæсгæ рацараздзысты, стæй ма адæмы ног кусæнгæрзтыл архайын дæр сахуыр кæндзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv