Цæгат Ирыстоны фæзындзæн дзидзайы куыст чи кæндзæн, ахæм куыстуат «Агро Юг»

Къабазы гæнæнтæ кæй арæзынц, уымæн æвдисæн Горæтгæрон районы Ирыхъæуы цы куыстуат аразынц, уый. Кæндзысты дзы дзидзайы куыст. Комплекс ифтонггонд уыдзæн æппæты нырыккондæр кусæнгæрзтæй. Проекты райрæзт къухы бафтыд республикæйы хъæууон хæдзарад æмæ хойраджы министрады æххуысæй. Фидæны куыстуаты арæнтæ ныридæгæн бæлвырдгонд сты. 1200 квадратон метрыл аразынц дзидзайы куыстгæнæн комплекс. Ацы фæззæг скусдзæн. Суткæмæ дзы фадат уыдзæн дзидзайы 5 тоннæйыл бакусынæн. Термокамерæйы уыдзæн куыстадон æмæ уазалгæнæн хайæдтæ. Уыимæ ма дзидза бафснайæн æмæ йæ куыст кæнæн хайæдтæ дæр. Куыстуат ифтонггонд уыдзæн æппæты нырыккондæр домæнтæн дзуапп чи дæтты, ахæм кусæнгæрзтæй. Кооперативы иумæ архайынц дзидзайы куыст чи кæны, ахæм 10 куыстуаты. Иу ахæм проекты райрæзтыл ма Мæздæджы районы дæр кусынц. Кæндзысты дзы дзидза æмæ æхсыры куыст. Кооперативы руаджы дзы фæзындзæн ног куысты бынæттæ 80 адæймагæй фылдæрæн. Уыимæ ма фæрмертæн фадат уыдзæн базарадон центрты сæ гæнæнтæ апарахат кæнынæн. Проект у инвестицион. Йæ райрæзтыл кусынц республикæйы хъæууон хæдзарад æмæ хойраджы министрады æххуысæй. Ивгъуыд аз уагдон бакуыста стурвосдарыны къабазы 18 проектыл. Ацы аз республикæйы хъæууон хæдзарады министрады хъæппæрисæй эксплуатацийы радтой æхсыры куыст чи кæны, ахæм 6 куыстуаты. Цæгат Ирыстоны стыр фæлтæрддзинад ис хъæууон хæдзарады къабазы рæзтæн. Ныр та ма фадат фæцис паддзахадон æххуысæй спайда кæнын. Снысан кодтой райрæзты 3 къабазы - фермеры куыст кæнын чи райдыдта уыдонæн гранттæ, бинонтæн фермертæ æмæ хъæууон хæдзарадон кооперативтæн. Уазиты Зæлинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv