Чысыл раздæр Цæгат Ирыстоны 11-æм хатт ацыд ирон æвзагæй глобалон диктант. Нæ телеканал «Осетия-Ирыстон» æй комкоммæ эфиры равдыста 4-æм хатт. 200 пункты диктант фыстой скъоладзаутæ, студенттæ, ахуыргæнджытæ æмæ, йæ зонындзинæдтæ мадæлон æвзагæй бавзарын кæй фæнды, уыдон се 'ппæт дæр. Ацы аз текст ист у Нарты кадджытæй, у таурæгъон, æмбæлы дзы 178 дзырды. Текст бакаст æппæтуæрæсеон конкурсы уæлахиздзау, Алайнаг гимназы ирон æвзаг æмæ литературæйы ахуыргæнæг Бекъойты Янæ. Нæ студийы диктант ныффыстой республикæйы  ахуырад æмæ наукæйы министры хæдивæг Дзанайты Марк, республикæйы культурæйы министры хæдивæг Хъуыссæты Зæлинæ, Дзæуджыхъæуы 7-æм скъолайы ирон æвзаг æмæ литературæйы ахуыргæнæг Габуты Маринæ, тагъд медицинон ӕххуысы станцӕйы кусӕг Хъесаты Адӕ, экономикон-базарадон колледжы студент Джыгкайты Давид æмæ Цӕлыччы астӕуккаг скъолайы ахуырдзау Джаджиты Кристинӕ. Бæрæггæнæнтæ базонæн уыдзæн цалдæр боны фæстæ Ахуырад æмæ наукæйы министрады сæрмагонд сайты.