Цæгат Кавказы хæххон-металлургон институты студенттæ ныссагътой бæлæстæ

Кæд абон райдзаст æмæ хурбон не’ скодта, уæддæр Цæгат Кавказы хæххон-металлургон институты архитектурæйы факультеты студенттæ сæ къухтæм райстой белтæ. Ахæм хуызы фæсивæд бацархайдтой «Зеленая Россия», зæгъгæ, экологон зиуы. Студенттæ паркты æмæ скверты ныссагътой бæлæсты талатæ. Зæгъæм, медицинон колледжы раз цы сквер ис, уым фæзынд 20 алыхуызон бæласы талайы: тулдз, тæгæр, сусхъæд æмæ кæрз бæлæстæ. Талатæ самал кодтой экологи æмæ æрдзон æвæрæнты министрад. Ахæм акцитæ аразынц республикæйы алы районы дæр. Æдæппæтæй фæнд кæнынц 500 талайы ныссадзын. Акци къухы бафтыд æрдз хъахъхъæныны æппæтуæрæсеон æхсæнад, стæй экологи æмæ æрдзон æвæрæнты министрады хъæппæрисæй. Йæ сæйраг нысан - экологон уавæр нæ бæстæйы фæхуыздæр кæнын. Зураб Майрансаев, æрдз хъахъхъæныны æппæтуæрæсеон организацийы Цæгат Ирыстоны регионалон хайады секретарь: «Мах фæнды нæ республикæйы цæрджыты æргом раздахын экологийы риссагдæр фарстатæм. Хорз уаид, алы адæймаг дæр акцийы куы бацархаид, уæд. Дзæуджыхъæу, æнæмæнг, фæрæсугъддæр уаид. Йæ цъæх фæлысты нымæцыл дæр бафтид. Иу бæлас ныссадзын æмæ йæ хæдзары раз бафснайын, мæнмæ гæсгæ, алкæй бон дæр у. Уæд нæ республикæ уаид аивдæр æмæ сыгъдæгдæр». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv