74 азы размæ Мæскуыйы сарæзтой Уæлахизы парад

Абон 74 азы размæ Мæскуыйы сырх фæзыл сарæзтой æфсæддон парад. Разамынд ын лæвæрдта Константин Рокоссовский. 10 сахатыл æм Кремлы дуæрттæй иуыл рахызт Советон Цæдисы Маршал Георгий Жуков. Йæ арфæйы раныхасы фæстæ Сырх фæзыл азæлыд Советон Цæдисы гимн æмæ райдыдта парад йæхæдæг. Архайдтой дзы, Фыдыбæстæйы Стыр хæсты тохы быдырты йе `хсардзинад чи `вдыста, уыцы гæрзифтонг тыхты дæлхайæдтæ, æфсæддон академиты æмæ училищæты ахуырдзаутæ, Мæскуыйы гарнизоны салдæттæ. Парады рæнхъыты ма уæлдай кадджын бынат бацахстой Советон Цæдисы Хъæбатыртæ, Намысы орденты Кавалертæ, номдзыд рæстдзæвинтæ, стæй бирæ хæрзиуджыты аккаг чи ссис, уыцы `фсæддонтæ. Уыдысты ма дзы фистæг æфсæдтæ, танкисттæ, тæхджытæ, сапертæ, бастдзинады кусджытæ æмæ `ндæр дæлхайæдты службæгæнджытæ. Сæ сæрмæ зындысты 36 тырысайы. Амыдтой, уæлдай тынг чи фесгуыхт хæсты быдыры, уыцы æфсæдты бæрц. Берлинæй сæрмагондæй æрбаластой, Рейхстаджы сæрмæ кæй ныссагътой, уыцы тырыса дæр. Парады ма фенæн уыдис немыцаг тырысатæ. Уыдысты 200-йы бæрц. Фæлæ сæ Советон Цæдисы салдæттæ хардмæ даргæ дæр не скодтой. Уый нæ, фæлæ сæ æгады калдæй Мавзолейы бынмæ цæндæй баппæрстой. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv