Фермертæн æххуыс

Нæ республикæйы хицауад хъæууон хæдзарады райрæзтмæ здахы уæлдай æргом. Фермертæн æххуыс кæнынц гранттæ хуызы паддзахадон программæты фæлгæты. Программæмæ цы фермерты бахастой, уыдоны хæдзарадтæм кæсы сæрмагонд къамис. Къамисы уæнгтæ ацы хатт абалц кодтой Горæтгæрон районмæ. Къамисы уæнгтæ сæ балц райдыдтой Джызæлæй. Таймазты Алан сын æвдисы йæ зæрды фос дарын кæм ис, уыцы агъуыстытæ. Нæлгоймаг фæнд кæны мыггаджы фос дарын, дзидза æмæ æхсыры куыст кæнынæн. Куыд зæгъы, афтæмæй уыцы куыстæн йæм ис æппæт уавæртæ дæр. Йæ хæдзарадон куыстады фыццаджыдар архайдзæн экологон æгъдауæй сыгъдæг продукци уадзыныл. Гранты фæрæзтæй та йæ фæнды балхæнын францаг стурвос Монбельярд, зæгъгæ. «Монбильярд у францаг стурвосы хуыз. Иннæтæй хъауджыдæр у уымæн æмæ йе 'хсыры хæрзхъæд у. Цыхт ахсынæн у иттæг хорз. Уæлдайдæр та, хъæбæр хуызтæн. Ам цыдæриддæр уынут, уыдон рацарæзтам нæхи хъарутæй», - фермер Таймазты Алан. Æдæппæтæй къамис бабæрæг кодта Горæтгæрон районы 9 стурфос дарæн хæдзарады. Се 'ппæт дæр фæнд кæнынц сæ куыстад рацаразын, кæнæ та сæ гæнæнтæ фæуæрæхдæр кæнын. Министрады куыд фæбæрæг кодтой, афтæмæй программæйы фæрæзтæ зынгæ фæфылдæр сты фаронимæ абаргæйæ. Ацы аз стурвос чи дары, уыцы фермертæн баххуыс кæнынæн фæрæзтæ радих кæндзысты федералон æмæ республикæйы бюджеттæй. Хъæууон хæдзарады министрады кусджытимæ Горæтгæрон районмæ абалц кодтой Россельхозбанчы минæвæрттæ дæр. Фермертимæ æрныхас кæнынц паддзахадæй цавæр æххуыс у сæ бон райсын, ууыл. «Фыццаджыдæр сын баххуыс кæндзыстæм грантты хуызы. Арæхдæр хъæууон хæдзарады кусджыты фæхъæуы льготæтæм гæсгæ кредит райсын. Кредиттæ та сын радтæм 5 процентыл. Ныртæккæ ахæм хорз гæнæнтæ ис æрмæст ацы къабазы», - РЦИ-Аланийы Россельхозбанчы хайады генералон разамонæг Георгий Ходаковский. 2018 азы паддзахадон программæйы æххуысæй нæ республикæйы фæзынд 17 ног фермерон хæдзарады. Ацы аз уыцы бæрæггæнæн фæнд кæнынц фæфылдæр кæнын. Сæ куыстады райрæзтæн фæрæзтæ грантты хуызы чи райсдзæн, уыдоны сбæрæг кæндзысты майы. Фæрæзтæ дæр сын хъуамæ уæд радих кæной. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv