Дзæуджыхъæуы администрацийы сæргълæууæг Милдзыхты Вячеслав фембæлд журналисттимæ

Дзæуджыхъæуы администрацийы сæргълæууæг Милдзыхты Вячеслав фембæлд журналисттимæ æмæ блогертимæ. Æрдзырдтой горæты трамвайты системæйы рацарæзтыл, фæндæгты цалцæг æмæ æхсæнадон бынæтты аивдзинадыл. Горæты трамвай рагæй сси Дзæуджыхъæуы фидауц. Æхсæнадон транспортæн ис дӕргъвӕтин истори. Трамвайы куыстæн электрон коммуникацитæ нæ республикæйы сæйраг сахары фæзындысты 1904 азы. Системæ нымад у Уæрæсейы æппæты рагондæртæй иуыл. Ныртæккæ йæ хъæуы рацаразын. Модернизацийы фæлгæты афæдзы кæронмæ фӕнд кӕнынц ауадзыны ныллӕгбын трамвайы эксперименталон хуыз. Уый размæ та уал базилдзысты æфсæнвæндæгтæм æмæ ласӕн дæлстанцӕтӕм. Горæты фæндæгтæм дæр здæхт цæуы уæлдай æргом. Сæ цалцæгæн фидæны аз рахай кæндзысты 743 милуан сомы. Уый хыгъд рацараздзысты горæты 10 хиды. Сабырдзинады проспекты саив кæндзысты Ленины номыл фæзуат. Уырыссаг театры раз хæдтулгæтæн фæндаг айсдзысты, ӕмӕ афтæмæй фистæгцæуджыты къахвæндаг фæдаргъдæр уыдзæн. Уый хуыздæрырдæм фæзындзæн архитектурон объектты æддаг бакастыл. Куыстыты сæйраг хæс - цæрджыты удæнцойæн æппæт мадзæлттæ саразын. Дзæуджыхъæуы æддаг бакастмæ, гæнæн ис, æмæ фæзыной ног домæнтæ. Цы ног бæстыхæйттæ арæзт цæуынц, уыдон, администрацийы хъуыдымæ гæсгæ, халынц горæты архитектурон аивдзинад. Хъуамæ сæ аразой бæстон, авг æмæ дурæй. Архитектурон ансамбль цæмæй нывылгонд æрцæуа, уый тыххæй уал бакусын хъæуы, уынгты цы рекламæ ис, уыимæ. 6 метры дæргъæн рекламон фæйнæджытæ халынц Дзæуджыхъæуы æддаг бакаст. Мэр Милдзыхты Вячеслав бахаста ахӕм, фæндон, цӕмӕй ивд ӕрцӕуой сити-форматтыл. Милдзыхты Вячеславы ныхæстæм гæсгæ, райхалинаг фарстатæ бирæ сты. Сæ иу - хæдтулгæтæн æрлæууæн бынæттæ. Машинæты нымæц афæдзæй-афæдзмæ рæзы 15% бæрц. Уымæ гæсгæ хæдтулгæтӕн бынат нал фæфаг кæны. 2 эвакуаторæй уæлдай ма уынгты тагъд рæстæджы фæзындзæн 4. Дзæуджыхъæу рæзы, уымæ гæсгæ фылдæр кæнынц райхалинаг фарстатæ дæр. Куыдфæндыйы цæстæй чи нæ кæсы уавæрмæ, ахæм цæрджытæ æмæ мэрийы æнтыстджын архайд. Уый у сæйрагдæр домæн Дзæуджыхъæуы бæлиццаг фидæнæн. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv